Asturies presenta en FITUR una aplicación turística nueva pa dispositivos móviles y tabletes

‘Turismo Asturias’ ye’l nome de l’aplicación turística nueva que yá ta disponible en Google Play y n’Apple Store. Permite facer reserves en llinia, sincronizar l'axenda d'eventos del país y descargar rutes multimedia, y presentóse nel stand d’Asturies en FITUR.

El direutor xeneral de Comerciu y Turismu, Julio González Zapico, presentó ‘Turismo Asturias’ nel marcu de la Feria Internacional de Turismo (FITUR) que se ta celebrando estos díes en Madrid y a la qu’Asturies acudió con una destacada instalación de calter promocional. La intención del Gobiernu con esta aplicación nueva ye reforciar la presencia de la promoción turística d’Asturies na rede, pa lo qu’ufre esta guía virtual de baldre pa los visitantes con más de 5.000 fiches de recursos xeoposicionaos y más de 6.000 fotografíes, amás de mapes interautivos de cada recursu turísticu y rutes completes pa descargar.

Amás, ufierta la posibilidá de realizar reserves en llinia, cuenta tamién con una axenda d'eventos turísticos y culturales actualizada a tiempu real, cola posibilidá de sincronizala al calendariu del móvil o tableta, y muestra rutes, museos y restoranes. Tamién ufre conteníu de la web ensin conexón y la posibilidá de compartir conteníu de manera direuta en redes sociales.

Un stand espectacular

El stand d’Asturies nesta edición de FITUR tien dellos volumes con hasta 6 metros d’altor, acompañáu de superficies impreses de sobresalientes dimisiones con imáxenes de los recursos turísticos principales del país, y ta dedicáu principalmente a la gastronomía y la calidá turística, con un enfoque promocional y comercial. L’espaciu articúlase alredor d’una plaza central, presidida por un ‘videowall’, qu’actúa como distribuidor pa les demás dependencies.