Asturies algama un tope históricu nuevu: 107.608 paraos

El nuesu país zarró’l mes de xineru con 107.608 paraos tres una xuba del 3,68 por cientu nel númberu de desemplegaos nel mes de xineru. Esti datu ye’l más altu dende 1996, cuando principió la serie histórica actual.

La meyoría d’avientu, cuando se rexistró un descensu del 1,36 por cientu nel númberu de persones inscrites nes oficines asturianes del serviciu públicu d’emplegu (-1.429), foi daqué coxuntural, como amusen les cifres de xineru. Nesti mes últimu 3.821 persones pasaron a formar parte de les llistes del paru, lo que supón una medra del 3,68 por cientu, superior a la estatal, del 2,72 por cientu (132.055, pa situar el total en 4.980.778). El territoriu onde más medró’l desemplegu nesti tiempu foi en Navarra (7,03 por cientu), al que siguen Galicia (4,31) y Extremadura (4,22 por cientu). Mentes, los únicos qu’ufren datos positivos son Melilla (-5,74 por cientu), Illes Balears (-0,34 por cientu) y Ceuta (-0,27 por cientu).

Otra manera, la medra interñal del paru n’Asturies foi del 11,39 por cientu, lo que supón 11.001 persones más ensin trabayu nos 12 meses últimos. Esti porcentaxe tamién ye mayor que la media estatal, asitiada nel 8.28 por cientu (380.949). Castilla-La Mancha (14,71 por cientu), Melilla (13,55 por cientu) y Cantabria (13,05 por cientu) lideren l’aumentu de paraos nesti añu, mentes qu’Illes Balears ye’l territoriu únicu que presenta datos positivos (-3,46 por cientu).