Arranca la Selmana de les Lletres Asturianes dedicada a Ígor Medio

Esti 2022 el dibuxante de cómic y músicu Ígor Medio cumpliría 50 años. Como homenaxe, la Conseyería de Cultura, Política Llingüística y Turismu decidió dedica-y la XLIII Selmana de les Lletres Asturianes, que va contar col tradicional llibru conmemorativu, un documental, una esposición, una mesa redonda y dos conciertos.

Ruma Barbero y Norman Fernández Tascón encargáronse de coordinar toles iniciatives que se van desendolcar na gran celebración de la nuesa lliteratura, que s’inaugura esti meudía nel paraninfu de la Llaboral. Nel actu va presentase ‘Ígor Medio. El carbón y l’arena’, llibru qu’axunta nueve artículos qu’analicen l’heriedu d’esti creador y inclúi bien de testimonios gráficos de la so vida y obra, y va estrenase’l documental ‘Onde soi quien quiero ser. Una semblanza d’Ígor Medio’.

Yá pela tarde, a les 18 hores, va inaugurase la esposición ‘Xente llano de Xixón. La obra gráfica d’Ígor Medio’ nel Muséu Barjola, eventu que se va completar con una sesión musical d’improvisación por parte d'Alberto Ablanedo, Rubén Bada, Pepín de Muñalén y Dolfu R. Fernández. L’amuesa va tar abierta hasta’l 3 de xunu n’horariu de 11.30 a 13.30 y de 17 a 20 hores, de martes a sábadu, y de 12 a 14, los domingos.

Ún de los momentos más especiales de la Selmana va ser el ‘El conciertu d’Ígor Medio’, el miércoles a les 20 hores nel teatru de la Llaboral, cola participación de Felpeyu, banda fundada por Medio y el propiu Barbero. Integrantes de Tuenda, DRD, La Bandina’l Tombo y Corquiéu van tocar cola actual formación d’ún de los grupos folk asturianos más internacionales, amás de José Manuel Tejedor, Mapi Quintana, Bree Delian, Alberto Sánchez, Xuan Nel Expósito, Cástor Castro, Félix Castro, Toño Gómez, Xel Pereda y Isidro Suárez.

La Orquesta Sinfónica del Principáu d’Asturies (OSPA) va ser parte tamién de la fiesta de la nuesa lliteratura y programa un ‘Conciertu de les lletres’ per segundu añu, el xueves a les 20 hores nel Auditoriu d’Uviéu. Nesta ocasión el direutor Daniel Sánchez Velasco, con Héctor Corpus como violinista solista, va estrenar la so obra ‘Concierto para violín y orquesta’ y ‘Tributo a Richard Estes’ de Juan Méndez, completándose’l programa con ‘Córdoba en un sueño’, de Raquel Rodríguez.

Pa les dos actuaciones entovía queden entraes, que se puede acutar de baldre nes páxines de la Llaboral y de la OSPA.

XLIII Día de les Lletres Asturianes

La última actividá va tener llugar el vienres 6 nel Barjola y va consistir nuna mesa redonda entitulada ‘¿En qué andaría Ígor? El cómic asturianu güei’, cola participación de Raquel Lagartos, Ernesto García ‘Neto’ y el propiu Barbero, cola moderación de Chechu García. Va principiar a les 18.30 hores, con entrada llibre.

Esti día, amás de los actos qu’entama l’Academia de la Llingua Asturiana esti añu nel uvieín Teatru Filarmónica, va celebrase’l Día del Llibru Asturianu, nel que 57 llibreríes de tol país presenten un 10 por cientu de descuentu en llibros y discos n’asturianu y gallego-asturiano y entrega conmemorativu de la Selmana de baldre. Pal Eo-Navia edítase ‘Contos eonaviegos’, una escoyeta de 28 rellatos d’otros tantos autores espublizada pa la ocasión.