Antón García anima a disfrutar d’una Selmana de les Lletres “pensada pa que-y prestara a Ígor”

“Creo que nunca, nes 43 ediciones, tantes persones involucraron pa llograr un homenaxe tan cálidu a una de les nueses figures más cercanes y queríes”, aseguró Antón García, direutor xeneral de Política Llingüística, na inauguración de la Selmana de les Lletres dedicada a Ígor Medio. Ruma Barbero, que representó a los coordinadores, afirmó que “tamos mui ilusionaos col conciertu” de la Llaboral.

El paraninfu del edificiu civil más grande d’Asturies y del Estáu acoyó la inauguración de la gran fiesta de la nuesa lliteratura. Un llugar, al estudiar ellí de mozos, bien conocíu por Medio y Barbero, que confesó que yera onde-yos llevaben “cuando nos sacaben del aula pa contanos una cosa un poco más estensa”, polo que lo venceyaba “a una chapa curiosa” que, bromió, “espero que nun seya’l casu”.

Reinó la emoción nel llugar, sobre manera a partir de la proyeición del documental dedicáu al músicu y dibuxante de cómic que nun dexó a naide indiferente, pero tamién l’humor que siempre acompañaba a Medio, fináu hai cuasi 16 años “nun triste accidente de tráficu que tamién se llevó a Carlos Redondo” recordó García. El representante de Política Llingüística definió la Selmana de les Lletres Asturianes como “unes xornaes celebratories que xunten alcordanza y reivindicación; reivindicación porque sigue siendo necesario pidir que s’atienda pa los derechos llingüísticos de la ciudadanía de fala asturiana, y alcordanza porque la mayoría de les veces a lo llargo d’estes trés décades la selmana sirvió pa propiciar el rescate y l’actualización d’un nome desconocíu, d’un home o una muyer que contribuyeron col so trabayu a dignificar dalgún aspecto de la lliteratura asturiana ensin que la sociedá-yos devolviera’l reconocimientu qu’ameritaben”.

Nesta ocasión, con motivu del 50 aniversariu del so nacimientu, la Conseyería de Cultura, Política Llingüística y Turismu decidió homenaxar al xixonés, “tan cercanu nel tiempu qu’hai que facer un considerable esfuerzu pa pensar que yá nun ta ente nós”. “Seguramente sucede esto porque la contribución d’Ígor a la cultura asturiana, tanto nel xéneru de cómic como na música, foi novedosa, radical y perdurable. Pensemos un momentu qu’Ígor tenia 35 años cuando muerre y pensemos darréu nel legaú que nos dexa”, rescampló.

Asina fixo referencia a la so “sólida obra del xéneru de la historieta, con una entrega mayor, ‘La familia Castañón’, que sitúa a Ígor Medio a l’altura inconográfica del popular Alfonso y les sos creaciones Pinón, Telva y Pinín, o Adolfo García y les suyes de Xuanón, sólo qu’hai un pasu alantre considerable nel trabayu d’Ígor: mientres qu’aquellos personaxes se somorguiaben nel costumismu, seguramente proviniente del teatru popular asturiana, la familia de papel d’Ígor vive nel presente d’Asturies, ye ‘urbanita’ y tamién fala asturianu. Los d’Alfonso y Adolfo miren pa una Asturies nel so tiempu yá irreal, pensái como viste Telva na posguerra asturiana, y falen castellanu anque de xemes en cuando iluminen el so discursu con palabres de casa”.

‘El carbón y l’arena’

Nel aspeutu musical, el de Tuña apuntó que “dexó una fonda buelga, como s’encarga de documentar Ignacio Llope nel artículu que fai” pal llibru conmemorativu de la XLIII Selmana de les Lletres, entituláu ‘Ígor Medio. El carbón y l’arena’, “que fala de la so vida y obra”. Xunto’l pixuetu escriben nél Boni Pérez, Gloria Caamaño, Chechu Álava, Miguel Rojo, Norman Fernández, Fernando Álvarez-Balbuena y Pablo Batalla, con presentación del presidente Adrián Barbón y prólogu del propiu Fernández y Barbero, coordinadores de toles actividaes xunto con Sonia Tuya, madre de Medio, y el dibuxante Javier Rodríguez.

“Son xente qu’escribe mui bien y que yera mui cercano a Ígor, que faen un percorríu bien interesante dende lo más personal y lo más téunicu”, añadió Barbero sobre esti llibru. “Podemos ver delles páxines inacabaes de les que facía pa proyeutos futuros o dibuxos que tenía nuna llibretina personal que siempre diba con él”, destacó’l tamién autor de cómics.

Dalgunes d’estes persones tamién participaron nel documental ‘Onde soi quien quiero ser. Una semblanza d’Ígor Medio’, dirixíu por Pablo Campillo y producíu por FPS Servicios Audiovisuales. Ye’l casu de Llope, Caamaño y Álvarez-Balbuena, a los qu’hai que sumar a Tuya, Vicente García Oliva, Lluis Antón González, Rodríguez, Barbero, Boni Pérez, Fonsu Mielgo, Lisardo Lombardía, Rubén Bada, Fernández y Leticia Baselgas.

Ye un percorríu pela vida de Medio, con semeyes y vídeos vieyos, dividíes en delles estayes: ‘Los raigaños’, ‘L’entamu’, ‘La música’, ‘El cómic’ y ‘La cultura como ferramienta política’. Y pa finar, una emotiva interpretación de ‘Los fayeos de mayo’ por parte de los miembros actuales de Felpeyu nel que la voz del cantante y baxista Aníbal Menchaca s’entemez cola d’Ígor d’una actuación en direuto nun de los momentos más emocionantes d’un audiovisual que se va poder ver esta nueche a les 23.15 hores en TPA.

Felpeyos y collacios

“Ígor Medio ye, como nos recuerden los sos munchos amigos y amigues, una bona persona, un estraordinariu talentu creativu, un artista xenial que marchó enantes de tiempu. Con esta Selmana de les Lletres Asturianes lo que queremos ye que vuelva al primer planu de l’actualidá mediática rindiendo-y un homenaxe, refrescando pa les xeneraciones más moces quién foi, qué fexo y cómo lo fexo”, señaló García, qu’agradeció’l llabor de toles persones que collaboraron en sacar alantre esta edición de la gran fiesta de la nuesa lliteratura. “Creo que nunca, nes 43 ediciones d’esta celebración” tantes persones involucraron pa llograr un homenaxe tan cálidu a una de les nueses figures más cercanes y queríes, aseguró.

Por último, llamó a disfrutar d’una selmana “pensada pa que-y prestara a Ígor: divertida, folixera, participativa, sí, pero tamién fecha con rigor y con intelixencia, con pasión y con entrega. Oxalá sirva pa disfrutar del milagru de les lletres asturianes al través del compromisu d’Ígor Medio”.

Barbero, que detalló toles actividaes programaes ente güei y el vienres, tamién afaló a disfrutar “tanto como Sonia, Javi, Norman y yo disfrutamos coordinando” y confesó que “tamos mui ilusionaos col conciertu que vamos facer mañana. Vamos tar los felpeyos con muncha xente que son amigos y qu’en munchos casos foron grupos que xuntó y produxo, o que compartió munchu tiempu nel escenariu, de tocar en sesiones y demás”.

Una cita que va tener llugar mañana a les 20 hores nel teatru de la Llaboral –entovía queden dalgunes poques entraes que se pueden acutar de baldre nesti enllaz– con integrantes de Tuenda, DRD, La Bandina’l Tombo y Corquiéu, amás de José Manuel Tejedor, Mapi Quintana, Bree Delian, Alberto Sánchez, Xuan Nel Expósito, Cástor Castro, Félix Castro, Toño Gómez, Xel Pereda y Isidro Suárez, y que va quedar rexistrada pa la posteridá.

Na semeya, García y Barbero col llibru conmemorativu d'esta Selmana de les Lletres Asturianes nes manes.