ArcelorMittal anuncia que va reducir la producción nes plantes asturianes nun 16 por cientu

|
Avilés ArcelorMittal

El debilitamientu de la demanda, l’aumentu de les importaciones xunto con insuficientes midíes de proteición comercial na XE y el costu de la enerxía y de les emisiones de CO2 lleven a ArcelorMittal a reducir la so producción n’Europa. Les dos plantes asturianes vense afeutaes con una mengua del 16 por cientu.

Asturies, Polonia y Italia son los trés países que van sufrir estos recortes temporales que tendrá repercusión nel emplegu. En total la reducción ye de 3 millones de tonelaes, de 700.000 nel casu de les factoríes asturianes de Cabecera (fornu altu y acería), lo que supón una mengua del 16 por cientu que previsiblemente llevará a un Espediente de Regulación d’Emplegu (EME) que la direición treslladará a los sindicatos.

Pa esplicar el casu concretu asturianu, la empresa fai referencia concreta a los costos de lletricidá, “mui ellevaos”. Tamién apunta que “el mercáu nel sur d’Europa viose afeutáu por un aumentu ensin precedentes de los volúmenes d’importaciones procedentes de países estracomunitarios”.

La decisión difícil de reducir temporalmente la producción nes nueses instalaciones de Cabecera nel segmentu de Productos Planos n’Europa nun se tomó a lo xole. Somos conscientes del efeuto qu’ello tien pa los emplegaos y les comunidaes llocales y esforciarémonos n’asegurar l’afitamientu de midíes sociales p’apoyales mientres esti periodu”, afirmó Geert van Poelvoorde, direutor executivu d’ArcelorMittal Europa-Productos Planos.

L’altu cargu de la empresa apuntó que “estes actuaciones reflexen la debilidá de la demanda na coxuntura actual n’Europa, una situación que se ve agravada por un aumentu de les importaciones a pesar de les midíes de proteición establecíes pola Comisión Europea”, a lo que se sumen “los costos enerxéticos ellevaos y los crecientes costos venceyaes a les emisiones de carbonu”. “La industria siderúrxica n’Europa pue tener un futuru prósperu, pero ye preciso que s’afite un marcu de competencia n’igualdá de condiciones p’asegurar que nun se dea una ventaya inxusta a los competidores estracomunitarios”, demanda en referencia a les emisiones de carbonu.

“Esperemos que sía circunstancial y que se pueda apangar”, declaró al respeuto Isaac Pola, conseyeru d’Emplegu, Industria y Turismu, que demandó midíes pa igualar el costu final de la enerxía pa les industries lletrointensives “col de países de la nuesa redolada” y un arancel medioambiental por parte de la Xunión Europea (XE) a les importaciones. El Gobiernu estatal entá tien pendiente d’aprobar un estatutu que protexa a estes empreses lletrointensives, qu’anunciara nun primer momentu p’abril. 

Les midíes en Polonia y Italia

ArcelorMittal va paralizar en Kraków temporalmente la producción nes instalaciones siderúrxiques de Cabecera, yá qu’entiende que’l mercáu del aceru en Polonia se vio afeutáu sobre manera pol incrementu de les importaciones d’aceru procedentes de Rusia, hasta cuatro veces más nel 2018 en comparanza col 2017. Tamién fai referencia a los precios de la lletricidá, “que s’asitien ente los más altos d’Europa”.

No que respeuta a Italia, va ralentizase’l plan d’incrementu de los volúmenes d’espediciones, que contemplaba algamar los seis millones de toneles en términos añales.

Semeya obra de C. Gutiérrez na factoría d'Avilés, propiedá d'ArcelorMittal ©.

Contador Estadistiques