ArcelorMittal anuncia axustes nuevos pola “debilidá del mercáu” qu’afeuten a Asturies

Depués de la mengua d'un 16 por cientu de la producción nes plantes asturianes comunicada esti mes, ArcelorMittal anuncia axustes nuevos. En concreto, va ampliar la parada programada nel cuartu trimestre d’esti añu pa reparar el fornu altu de Xixón.

Esta planta asturiana nun ye la única afeutada, yá que la siderúrxica tamién va reducir la so producción nes instalaciones de Cabecera (fornu altu y acería) de Duinkerke, nel Estáu francés, y Eisenhüttenstadt, n’Alemaña, amás d’en Bremen de cara al cuartu trimestre del añu, con ampliación tamién de la parada programada d’un fornu altu pa la realización de trabayos de mantenimientu. Estos axustes súmense a los anunciaos el 6 d’esti mes en Kraków (Polonia) y nes factoríes italianes, amás d’en Xixón y Avilés, con una mengua de 700.000 tonelaes n’Asturies.

“Trátase de nuevo d’una decisión difícil que tuvimos qu’adoptar, pero dao’l nivel de debilidá del mercáu, entendemos que se trata d’una llinia d’actuación prudente. Será una midida de caráuter temporal, que se dexará d’aplicar cuando meyoren les condiciones del mercáu. Mentanto, los nuesos emplegaos siguen siendo la nuesa prioridá máxima y tamos faciendo tolo posible p’asegurar l’afitamientu de midíes sociales afayadices pa sofitales, a ellos y a les sos families, mientres esti periodu difícil”, apuntó Geert van Poelvoorde, direutor executivu d’ArcelorMittal Europa-Productos Planos.

Na imaxe, fornos altos de Xixón. Semeya obra de Borvan53 baxo llincencia CC BY-SA 4.0.