Alonso va tornar a la F1 con Renault nel 2021

La escudería francesa ta acabante de facer oficial el fichaxe del pilotu uvieín.

Finalmente confirmáronse los rumores y Fernando Alonso, de 38 años, va ocupar un asientu en Renault la temporada que vien de Fórmula 1. D'esta forma 'Nano' vuelve a trabayar cola marca del rombu, cola que consiguió los sos dos campeonatos, nel 2005 y nel 2006.

A les 13 hores dábase anuncia oficial de la incorporación pal añu qu'entra, yá qu'esti añu Alonso sigue centráu n'algamar la Triple Corona, esto ye, vencer nes 24 Heures du Mans, el Grand Prix de Monaco y la Indy 500, honor que namái tien l'inglés Graham Hill. Coles dos primeres yá algamaes, l'uvieín va pola prueba estauxunidense, que se va correr nel míticu circuitu d'Indianapolis el 23 d'agostu.

"Ye la mio familia"

Alonso señaló tres l'anuncia del fichaxe que "Renault ye la mio familia, los mios meyores recuerdos na Fórmula 1 colos mios dos títulos de campeón del Mund, pero agora miro p'alantre". "El progresu esti iviernu da credibilidá pa los oxetivos pa la temporada 2022 y voi a compartir tola mio esperiencia nes carreres con tolos inxenieros, mecánicos y compañeros d'equipu. Reanultu quier y tien too pa tornar al podiu, y yo tamién", añadió.

El compañeru d'equipu d'Alonso va ser el francés Esteban Ocon. Daniel Joseph Ricciardo va salir de la escudería cuando fine la campaña actual, qu'entamó'l domingu n'Austria con trunfu del finlandés Valtteri Bottas (Mercedes); Ocos finó n'octava posición y l'australianu nun acabó la carrera.