Fernando Alonso, campeón del mundu

Fernando Alonso consiguió ayeri'l campeonatu del mundu de Fórmula 1 al acabar en tercera posición nel Gran Premiu de Brasil. Anque l'asturianu salía dende la pole position, según foron pasando los kilómetros de la preba confirmóse la superioridá de McLaren Mercedes sobre'l Renault del asturianu, ocupando Juan Pablo Montoya y Kimi Raikonen nesti orde los dos primeros puestos del caxón, anque nello influyó tamién una interrupción de la preba que neutralizó'l pelotón, mientres qu'Alonso, faciendo una carrera aposentada pero ensin cometer fallos, afitaba'l tercer puestu que-y daba los puntos precisos pa ser campeón del mundu con namás 24 años, valtando la marca de mocedá del brasileñu Emerson Fitipaldi. La carrera nun tuvo mayor interés y foi de les más soses del añu, con fernando Alonso dexando pasar a Montoya pa nun forzar la situación nin esponese a posibles accidentes, pero va pasar a la historia pol coronamientu como campeón d'Alonso, que na rueda de prensa que se dio n'acabando la carrera declaró n'inglés qu'esti titulu nun-y lu tenía qu'agradecer a nadie sacantes "cuatro o cinco persones" en referencia a la familia y que pa elli tenía un valor especial ganar el títulu en cuantes que llevaba "tola vida trabayando en solitario" y que venía "d'un país ensin tradición de deportes del motor". Na segunda parte de la rueda de prensa, y yá en castellanu, Alonso dedicó-y el títulu a l'afición.

La fonte de la Gabinona n'Uviéu foi ayeri'l puntu de concentración de los seguidores del pilotu asturianu pa festeyar el campeonatu del mundu acabante ganar, durando les celebraciones hasta altes hores de la madrugada. Na rede, el foru de Fernando Alonso fierve de mensaxes y les webs de les peñes de Fernando Alonso feliciten al campeón, dende la "Peña Asturias f1" hasta la peña "El Gaxapu" de Morcín. Pela TV, la carrera tuvo n'España una media d'ocho millones d'espectadores, y 13,5 millones de persones conectaron en dalgún momentu cola señal de Tele5 que tresmitía lo que pasaba na pista d'Interlagos

D'otra manera, La prensa internacional acuta bien de páxines y dacuando hasta la portada, pa falar de Fernando Alonso. Mientres na prensa española nun hai más tema de portada pa tolos periódicos deportivos y xeneralistes , la prensa francesa céntrase nel trunfu d'un "pilotu Renault", anque la semeya de portada en "L'Equipe" ye pa Fernando Alonso, que tien más protagonismu que'l bronce francés nel eurobasket. La prensa inglesa, el país con más tradición na F-1 sorraya la mocedá de la nueva estrella del motor, como rescampla nel especial de la BBC que pide que se "salude al nuevu rei" mientres que na tierra del campeón saliente Michael Schumacher fai otro tanto, col Der Spiegel tiulando "de campeones del mundu y neños-milagru" y falando del "Rei Fernando". La nota simpática pónenla los medios hindúes que-y dan los titulares al 15º puestu de Naraim Karthikeyan, l'ídolu local. Xusto lo mesmo que facíen los diarios d'equí con Alonso cuando corría con Minardi…