Almítese a trámite la proposición del Bloque contra’l maltratu animal

La Mesa de la Cámara de la Xunta Xeneral del Principáu calificó como proposición de llei y almitió a trámite la propuesta contra’l maltratu animal fecha pol Bloque por Asturies, al traviés del diputáu Roberto Colunga.

La proposición pide cambiar l’apartáu c) del artículu 20 de la Llei del Principáu d'Asturies 8/2002, de 21 d'ochobre, d'espectáculos públicos y actividaes recreatives, pola que se solicita que queden incluyíos dientro de les prohibiciones por maltratu animal, los espectáculos taurinos.
  
Según informó’l Bloque por Asturies, la mesa de la cámara tamién acordó treslladar la iniciativa al Conseyu de gobiernu pa que manifieste'l so criteriu al respecto a la toma de consideración, según la so conformidá o non a la tramitación, en casu de qu'implicare aumentu de los creitos o reducción de los ingresos presupuestarios.
 
El Bloque por Asturies señaló qu'acordies con la numberosa cantidá de pidimientos y muestres d'apoyu a esta Proposición de llei per parte de la ciudadanía, entama esti miércoles una campaña de recoyida de firmes. Los formularios van poder baxase al traviés de la so páxina web o del perfil del Facebook 'Bloque por Asturies'.

Na manifestación colos bomberos
D’otra miente, el Bloque por Asturies tamién apoyó de nuevu esti miércoles a los 21 bomberos que quier despidir el Gobiernu del Principáu. El diputáu del BA, Roberto Colunga, y más militantes de la organización tuvieron presentes na manifestación organizada polos bomberos d’Asturies contra los despidos.

Nesti sen, el Bloque esixó al Gobiernu del Principáu “el caltenimientu de los puestu de trabayu, l’aumentu de la plantiya cola incorporación de nuevos efectivos tres les oposiciones, la calidá d’un serviciu fundamental pa la seguridá ciudadana y el fin de los retayos de puestos de trabayu que ponen en peligro servicios públicu de calidá básicos y fundamentales como la sanidá, la educación y la seguridá pública”.