Alicia González aguantó coles meyores nel Mundial de Doḥa

El so trabayu permitió a rioxana Sheyla Gutiérrez Ruiz finar nel octavu puestu de la prueba elite de ruta en carretera.

Les temperatures altes de Doḥa perxudicaron a Alicia González Blanco, que llegó xusta de fuercies al tramu final. Sicasí la ciclista sierenense cumplió col so llabor d'ayudar a la xefe de files del combináu estatal dirixíu por Ramón González Arrieta pa que llegara con opciones al quilómetru últimu y que nun quedara colgada en dalgún corte.

Pese a nun ser velocista, la rioxana algamaba un destacáu octavu puestu, mientres que l'asturiana finaba na sesentava quinta posición a 16 segundos de la ganadora, la danesa de 20 años Amalie Dideriksen, que con esti trunfu confirma les bones sensaciones que venía dexando dende que yera junior. El podiu d'esta prueba del Mundial de Doḥa completáronlu la holandesa y una de les principales favorites, Kirsten Wild, y la finlandesa Lotta Lepisto.

Segundu maillot arcu la vieya siguíu pa Sagan

L'eslovacu Peter Sagan consiguió nes carreteres qatarines el so segundu Mundial siguíu tres vencer nel sprint a un grupu reducíu por mor d'un corte provocáu pol equipu belga que marcó la carrera y que dexó fuera de xuegu a España, Alemaña y Francia. Un trunfu de méritu, más viendo'l nome de los sos dos compañeros nel podiu: el británicu Mark Cavendish y el belga Tom Boonen.

El primer español foi Imanol Erviti, nel puestu trixésimu terceru, a 5 minutos y 26 segundos de Sagan.