33 opciones pa escoyer la 'Meyor noticia pal asturianu 2022'

|
Prensa periódicos

Iniciativa pol Asturianu entama per décimu añu siguíu esta votación popular n'Internet.

"Tamos mui contentos porque esta iniciativa estrenóse nel añu 2013 y cumple 10 años recoyendo bones noticies pal idioma. Cada exerciciu añal que pasa va medrando’l númberu de participantes y la cantidá de noticies positives", apunten dende esta organización al empar que recuerden que la 'Meyor noticia pal asturianu 2022' "tamién val pa facer un repás a tol llabor d’Iniciativa pol Asturianu y pa comprobar cómo añu a añu la llingua asturiana tien una repercusión positiva nos medios".

En total preséntense 33 opciones pa que los usuarios puedan escoyer hasta un total de 15 nesti enllaz hasta'l vienres 13. Ente elles inclúise 'El diariu n’asturianu Asturies.com fai 25 años n’activo'.

"Con esta campaña pretendemos facer llegar a la ciudadanía asturiana delles bones noticies pal nuesu idioma. Amás, dende Iniciativa pol Asturianu queremos recoyer lo positivo d’esti 2022 pal asturianu y treslladar que la llingua asturiana sigue ganando presencia nes instituciones y normalidá na sociedá", rescamplen.

Ente tolos participantes na escoyeta de la 'Meyor noticia pal asturianu 2022' la organización va sortiar un llote de llibros. L'añu pasáu resultó escoyida como la más destacada del 2021 la nueva 'El Congresu de los Diputaos sofitó’l puntu de la PNL que pidía la oficialidá de la llingua asturiana'.

Contador Estadistiques