‘El barriu y la casa los mios güelos’ ye’l títulu que lleva la primer edición del concursu de rellatos infantiles sobre testimonios rellacionaos col hábitat obreru que s’entama con motivu de les II Xornaes de Patrimoniu Industrial. Los trabayos pueden presentase hasta’l 21 de xunetu y los premios van consistir en llibros.

Factoría Norte representa esti vienres ‘La bruxa Llara’ nel Espaciu Escénicu de la Factoría Cultural d’Avilés. Esta actividá ye la cabera de les cuatro programaes nesti primer semestre pola Estaya de la Llingua y ‘Reciella. Families pol Asturianu’.

El martes finó la XXXVIII Selmana de les Lletres Asturianes, na que los escolinos y escolines del país foron protagonistes. Dos gales d’entrega de premios, visites guiaes, llectura de poemes y teatru n’asturianu foron les actividaes entamaes nestos díes d’homenaxe a la nuesa lliteratura.

La RTPA anunció que la estrena del programa infantil en llingua asturiana ‘Fálame’ va ser el domingu 21, en principio a les 9.15 hores. El deséu de la productora, Médula Producciones, ye que s’emita nun horariu más familiar.

L’Auditoriu del Centru Niemeyer va acoyer esti miércoles les XIV Xuntes d'Escolines y Escolinos d'Avilés cola participación de mediu millar d’alumnos y alumnes. Mentes, los Centros Socioculturales de la villa entamen cuentacuentos n’asturianu esta selmana.