Alejandro Fernandi: “El fútbol ye una ferramienta abondo útil como pa llendala al entretenimientu”

El domingu, a les 17 hores, el Rosal FC va xugar en L’Infiestu la ida del play-off pol ascensu a Primera Autonómica contra la Piloñesa. Alejandro Fernandi Álvarez (Uviéu, 1992), miembru de la direutiva, faló con Asturies.com sobre esti históricu club uvieín nacíu nos años 20 y qu’anguaño tien una xestión que sigue’l modelu de fútbol popular.

El Rosal ta completando un añu destacáu, con clasificación pal play-off.

Dende la direutiva nun podemos tar mas contentos colos resultaos nesti fin de temporada. No deportivo, l'equipu tien respondío de la meyor manera posible: clasificaos como segundos nel grupu II, ye dicir, clasificaos pal playoff d'ascensu a Primera Rexonal, la nuesa categoria tradicional –nótase que somos un equipu humilde–.

No alministrativo, pese a la montonera d'errores que seguramente cometeríemos a lo llargo del añu, tamién podemos dicir que tamos arguyosos del nuesu trabayu: un grupu con poca esperiencia que tien consiguío, gracies a l’aida de munchísimes persones, llevar esti proyeutu y algamar qu’el club siga vivu un añu mas.

¿Ve opciones d’ascensu?

Equí voi falar col corazón, que ye’l que 'piensa' nesti pequeñu mundu que ye’l fútbol. Teo y tenemos confianza ciega nos nuesos xugadores y nel nuesu cuerpu téunicu. Sé que xueguen bien, que son xente serio y lluchadora, y que si too vien de cara, la eliminatoria ye nuesa. Eso sí, nun podemos escaecer que delantre tenemos un hestóricu del fútbol asturianu, la Deportiva Piloñesa, equipu fundáu nel 1917, con unes 20 temporaes en Tercera y que representa a L'Infiestu, la capital del so conceyu, polo que tienen, por dicilo de dalguna manera, más presion a la hora de xubir.

Nel campu veremos, pos esti deporte depende de munchos factores como pa dar nada por fecho enantes de salir al prau a competir.

¿Cómo ye la historia d’esti club uvieín?

El club naz nos años 20, cuando un grupu de rapazos de la cai del Rosal –d’ehí’l nome– decide entamar a organizase pa xugar amistosos. Dellos de los socios más antiguos mos camentaren qu’hai documentos que demuestren que l’equipu fundóse nel 1924, anque nos decidiéremosnos pol añu 1929, yá que na documentacion que tenemos ésa ye la fecha qu’apaez.

El Rosal namái tien pasao per categories nacionales. Ye un club humilde qu’enxamas xugo a nivel de lliga estatal, pero que, pesie a ello, sigue vivu depues d’unos 90 años.

¿Cuándo dan el pasu de recuperar el proyeutu en busca del ascensu a Primera Autonómica?

Foi daqué bastante casual. Nós, la xente de la direutiva, somos persones cercanes al futbol –futbolistes profesionales y aficionaos/es– y gracies a la idea d’un miembru de la mesma, decidimos tirar por esti proyeutu una vegada supimos de la hestoria de la institución.

Nun queremos nin podemos dexar qu’un equipu talu –hestoria viva de la nuesa ciuda– quedara nel escaezu, amás de que yera una bona oportunida pa desendolcar dalgo más allá del fútbol habitual, averando’l futbol al barriu na midida de lo posible.

Deciden siguir el modelu d’otros clubes, como’l Ciares, de fúbol popular. ¿Por qué?

Porque creyemos que ye la meyor manera de xestionar una entidá como ye un club de fútbol. Esti deporte, amáu por munchísimes persones, tien de ser daqué más qu’un negociu nel que s’afayen les corrupteles y onde l’aficionau, práuticamente quien-y da vida, nun ye más qu’un cliente.

Tener al Ciares tan cerca de nós ye una ayalga. La so xente tienmos aidao dende l’entamu, yá que nós malpenes nun sabíemos cómo dirixir el proyeutu, magar les nueses ganes y entusiasmu pol mesmu. Siempres ye un bon momentu pa da-yos les gracies otra vuelta pol gabitu que mos tienen echao dende l’entamu.

¿El fútbol ye muncho más que deporte?

El fútbol ye una ferramienta abondo útil como pa llendala al entretenimientu, a la simple vision d’esti deporte como un garrapiellu de persones que-y dan pataes a un balón. Dende un club puede trabayase por y pa munchos proyeutos de caráuter social (recoyida de material escolar, d’alimentos, fondos pa oenegues, etc.), pa da-y visibilidá a una montonera de movimientos y problemes que, d’otra manera, nun tendríen el mesmu ecu de nun ser por too aquello que mueve esta disciplina que tien ‘enganchada’ a la metá de la población mundial.

¿Cómo ven esta opción de xestión el restu de clubes de la categoría?

El club col que mas afinidá tenemos ye l’Stiaua d’Asturies, yá que ye un equipu de fútbol que tamien tien muncho ciñu pa col asturianu y yá lleva más de diez años na categoría, dando-y visibilidá al idioma. Tamién tenemos bon tratu cola xente del Santiago de Aller, yá que tamién ye un club dirixíu por xente mozo, anque la so filosofía ye diferente a la nuesa.

Col restu de clubes tenemos bones rellaciones, magar qu’estes nun pasen del espeutru institucional y deportivu.

L’asturianu tien un espaciu destacáu nel proyeutu del Rosal.

Sí, nós somos xente asturfalante y concenciao con una de les llingües propies del nuesu país. Yá nun ye una mera cuestion de da-y visibilidá, de puxar pola mesma, ye dexar la hipocresía a un llau y aceutar que vivimos nuna socieda na que se falen mas llingües que’l castellán, y qu’esa xente tamién tien drechu a ver normalizáu’l so idioma como puede pasar n’Irlanda, Euskal Herria o Paraguai, países onde la llingua asimilada (inglés o castellén) suel tar –magar que non siempres– al mesmu nivel que les sos llingües llariegues.

En definitiva, dende’l Rosal nun quixéremos ver esto como daqué especial: falamos n’asturianu, escribimos n’asturianu y vivimos n’asturianu con tola naturalidá.

¿Tán los xugadores concienciaos nesta filosofía del club?

Asina ye. Amás, dende la so propia iniciativa. Ye mui guapo ver cómo xente qu’a lo meyor enxamás s’averara a esti tipu d’iniciatives sociales –desconocimientu o distancia, equí nun somos naide pa xulgar les opciones personales de caún–, entama a tener sensibilidá pa con esos proyeutos qu’ente toos y toes desendolcamos nel equipu.

Ellos saben que somos un club daqué diferente, que nos mueven otres coses alluendi del fútbol, onde valores como la llealtá, cooperacion, trabayu a comuña..., primen perriba de los resultaos.

¿Cuántos socios tien el Rosal?

Anguaño tenemos daqué más de 200 socios y socies, lo qu’aínda nun dexa de sorprendeme, pos hai munchos equipos en categoríes superiores que nun lleguen a esa cifra. Presta muncho ver cómo la xente quier averase al proyeutu; cómo los socios y socies mas antiguos insístente porque quieren el so carné; cómo va aportando xente nuevo…

L’asistencia al campu yá ye más moderada, con una media d’ente 30 y 40 persones, magar qu’en dellos partios, como escontral’l Langreo Eulalia, seique tuvimos, sumando dambes aficiones, ente 150 y 200 persones nes graes de Ganzábal. Esa baxada en términos d’asistencia ye esplicable si tenemos en cuenta que xugamos en Santa Marina de Piedramuelle, lloñe de la ciudá, yá qu’el campu hestóricu (Seminariu Metropolitanu) nun ta prauticable na actualidá y la otra alternativa (Campu de San Llázaro) nun foi posible debíu a desacuerdos col xestor de la concesión del mesmu, daqué que tampoco talantamos, pos ye un campu construyíu con fondos publicos que práuticamente ta regaláu a una empresa privada.

¿Qué perfil tienen los sos siguidores?

La verdá ye que nun se puede establecer un perfil común ente los y les siguidores del Rosal. Nes graes del Tensi I –el nuesu campu– hai xente cercano al asturianismu y al soberanismu, magar que tamien hai xente que ye aficionao a esti club dende muncho antes que nós llegáremos como direutiva.

Esti club ta abiertu a tol mundiu, siempres qu’eses persones tean d’alcuerdu cola nuesa filosofía. Lo unico que nun transiximos nin aceutamos nes nueses graes son actitues y comportamientos racistes, homofobos, xenofobos, etc.

El Rosal ye un club especial tamién en patrocinios, con editoriales o chigres culturales como sofitu económicu.

Sí, la xente tiense portao perbién con nés dende l'entamu del proyeutu deportivu. Nun asperábemos tanta ayuda en materia económica y como enantes-y agradecia al Ciares la so collaboracion, agora tamien tengo d'agradece-yos a toos los nuesos patrocinadores (Lata de Zinc, Aplinor, Trabe...) l'esfuerzu economicu y la valentía d’apostar por esti equipu.

¿Qué aspiraciones tien el club nel futuru?

Queremos xorrecer, sacar categories inferiores y equipos femeninos –pos na nuesa idea de futbol nun entra un club que namái seya masculín–, ameyorar en tolo que tenemos fecho mal y ser quienes a caltener y facer más grande la estructura del club, atraer a más persones al equipu, devolver al Rosal a la ciudá y, sobre manera, facer muncho ruíu.