Fomentu entama una campaña de promoción de la toponimia

Fomentu entama una campaña de promoción de la toponimia en collaboración con Cultura, qu’amás, va dedicar un millón d’euros pa subvencionar la promoción del asturianu.

El Ministeriu de Fomentu, al traviés de la Comisión Especializada de Nomes Xeográficos (CENG) -integrada nel Conseyu Superior Xeográficu- punxo en marcha una campaña estatal de promoción de la toponimia autóctona, en collaboración cola Conseyería de Cultura y Turismu del Principáu d'Asturies y otres comunidaes
españoles participantes. Asturies, al traviés de la so Direición Xeneral de Política Llingüística, forma parte d'esta Comisión dende l'añu 2008.
 
Por cuenta d'esta campaña, el Ministeriu editó'l cartafueyu informativu "Importancia de los nomes xeográficos y necesidá del so usu normalizáu", con una versión xeneral en castellán y con versiones nes demás llingües del Estáu, seyan oficiales -catalán, gallegu y vascu- o protexíes polos sos estatutos -como l'asturianu o aragonés-. Nel casu d'Asturies, la Direición de Política Llingüística collaboró na redacción n'asturianu y l'espardimientu nos distintos ámbitos ya instituciones del material informativu.
 
Nél, pue atopase información sobre la mesma Comisión Especializada de Nomes Xeográficos; sobre'l valor de los mesmos nomes xeográficos; sobre por qué ye necesaria la so normalización; a quién correspuende llevar a cabu dicha normalización; qué beneficios reporta; o cómo la normalización tien d’adaptase a les distintes llingües o variantes falaes n'España.
 
Dende’l Principáu apunten que los procesos de normalización y oficialización toponímica son comunes a toa España y tienen que ver col desenvolvimientu de les instituciones democrátiques y la creciente consideración de la toponimia como parte del patrimoniu cultural inmaterial, según reconoció la ONU na so resolución IX/4, del añu 2007. N'Asturies empezaron los trabayos de normalización toponímica nel añu 2004, cola puesta en marcha de la Xunta Asesora de Toponimia y l'apertura d'espedientes d'oficialización toponímica en diversos conceyos.
 
Según indiquen, nel nuesu país el procesu asturianu va esperimentar una considerable meyora nestos próximos meses cola aprobación de seis nuevos decretos. Nunes selmanes Teberga y Ribesella van ver aprobáu pol Conseyu de Gobiernu'l so decretu d'oficialización toponímica, en cuantes qu'Avilés, Quirós, Taramundi o Tapia -pendientes del trámite d'audiencia nos respeutivos conceyos- van ser los siguientes n'oficializase.
 
“Nos últimos meses, dende la Conseyería de Cultura y Turismu trabayóse mano a mano coles corporaciones locales y la Xunta Asesora de Toponimia na meyora de la tramitación de los espedientes, con vistes al llogru d'un máximu consensu ente toles partes”, señalen.
 
Cola aprobación d’estos espedientes, van ser yá cuarenta y seis los conceyos asturianos que tengan los sos topónimos tradicionales oficializaos, ventidós d'ellos nesta llexislatura. Otros diecisiete conceyos tienen abiertu'l so espediente, atopándose en distintes fases de tramitación: Santu Adrianu, Ayande, Caravia, Castripol, Llanera, Tinéu, Valdés, Ponga, Illas, Villanueva d'Ozcos, Somiedu, Bual, Uviéu, Ibias, Salas, Samartín d'Ozcos y Santalla d'Ozcos.
 
Un millón en subvenciones
 
Cultura destina 1.039.000 euros pa sofitar les iniciatives qu'impulsen l'usu del asturianu nes sos actividaes y, asina, “avanzar nel oxetivu de promocionar l'asturianu y el gallego-asturianu na sociedá”.

Esta cantidá distribúyese en tres grandes llinies d'ayudes. La primera ta destinada a entidaes locales y cunta con una dotación de 185.000 euros pa financiar proyeutos y actividaes de los conceyos empobinaos a la normalización social del asturianu. El plazu pa presentar proyectos remata'l llunes 19 d'abril.
 
La segunda convocatoria pretende ampliar el círculu de llectores y l'ámbitu d'espardimientu de la lliteratura asturiana. Ta abierta a empreses editoriales hasta'l día 5 d'abril y tien dos estayes: la publicación d'obres lliteraries o divulgatives n'asturianu o eonaviegu y la traducción y edición n'otres llingües d'obres asturianes. La dotación total ye de 210.000 euros.
 
La última son les subvenciones pa la normalización social del asturianu en distintos ámbitos, que tien una dotación de 644.000 euros y que sofita la presencia social de la llingua en medios de comunicación, estudios o trabayos d'investigación; actividaes d'asociaciones y empreses privaes; producción cinematográfica y de videu y edición musical. El plazu pa presentar proyectos a les distintes llinies de subvención va permanecer abiertu hasta'l 26 d'abril.