Primer fuelga na historia de la RTPA

La RTPA vive güei la primer xornada de fuelga de la so historia cola alarma de los sindicatos de “tar too preparáu pa que naide s’entere”. Dende CSI, sofiten amás la campaña de la Xunta.

El Comité d’Empresa de TPA, con representantes d’UXT, USO y CSI, yá tenía convocada una fuelga pal xueves 25 de febreru y el 3 de marzu. Éstes tuvieron qu’aplazase por problemes formales y decidieron convocala pa la xornada de güei y pa la del próximu vienres 19 de marzu y asina, facela con toles garantíes.
 
El llema de la convocatoria ye en contra de los “chanchullos, cacicaes, manipulación, amiguismos y redes clientelares de la TPA”.  El Comité d’Empreses tien tamién convoca pa güei una concentración na Plaza del Ayuntamientu de Xixón a les 19 hores.
 
Según CSI, güei ta too previsto pa vulnerar los drechos de los trabayadores y pa que naide s’entere de lo pasa na RTPA, “una programación que nun ye un serviciu básicu esencial programada con normalidá y un informativu normal, una estratexa de fixación de servicios mínimos destinada a minimizar los efectos de la fuelga, obligando a venir a trabayadores en xornada de descansu, frañando permisos recoyíos por conveniu, colocar en servicios mínimos a aquellos trabayadores que tienen voluntá d’acudir a la fuelga y dexando fuera de los mesmos a los trabayadores más indefensos”.
 
El sindicatu afita que la obsesión, “casi paranoide”, por evitar que los asturianos s’enteren de nengún conflictu o crítica a la xestión de la RTPA, “amuesa les sos grandes debilidaes”. Poro, esixe la realmisión del so compañeru y la fin de la política llaboral d’anguaño na RTPA, “amás de que los actuales responsables, Manuel Castrillo, Direutor de Recursos Humanos, y Juanjo Guerenabarrena, Direutor d’Antena y Conteníos, asuman les sos responsabilidaes”.
 
Sofitu a la presencia del asturianu
 
Dende la sección sindical de la CSI na RTPA amosaron el so sofitu públicu a la campaña entamada pola Xunta Pola Defensa de la Llingua, consistente nel unvio de correos electrónicos pidiendo una mayor presencia de la llingua na programación de la radio y la televisión a direutivos de la cadena.
 
Dende’l sindicatu conviden a los trabayadores de la RTPA y a la ciudadanía a siguir esta campaña, yá que “tanto los oxetivos de la RTPA como les declaraciones del propiu Ornia recueyen la promoción del asturianu como ún de los sos puntos”
 
Sicasí, dende CSI recuerden qu’anguaño hai una política de cuotes marxinales, “que más bien paez destinada a contentar sectores que pudieren tener una posición pública y crítica col actual modelu de televisión”. Tamién apunten que l’ésitu de programes como ‘Camín de Cantares’ dexó a más d’un direutivu “de mentalidá provinciana cola boca abierta”.
 
Señalen qu'una mayor presencia del asturianu contribuyiría a xustificar la esistencia d'una radiotelevisión pública y aumentar la so aceptación popular. “Queremos una radiotelevisión qu'apueste pola producción propia, pola visibilización de les distintes manifestaciones artístiques y culturales presentes nes ciudaes y pueblos d'Asturies, qu'apueste y arriésguese polos creadores audiovisuales, pola pluralidá, por una visión crítica de la realidá y el poder... y nesta llinia creemos que tien un encaxe afechu apostar de forma más clara pola presencia del asturianu na RTPA”, afirmen pa finar.
 
El Comité d'Empreses denuncia los "chanchullos" de la TPA