El Comité d'Empreses denuncia los "chanchullos" de la TPA

Los trabayadores de TPA van concentrase esti xueves 25 contra "los despidos y los chanchullos" na canal. La fuelga que taba convocada va facese n'otra fecha “p'asegurar toles garantíes”.

La concentración ye’l xueves 25 a les 19.00 hores delantre de la Xunta Xeneral del Principáu d’Asturies.

El Comité d’Empresa de TPA, con representantes d’UXT, USO y CSI, tenía convocada una fuelga esti xueves 25 y el 3 de marzu, en contra de los “chanchullos, cacicaes, manipulación, amiguismos y redes clientelares de la TPA”. Según indiquen dende CSI, “énte les amenaces de la direición de la TPA de declarar la fuelga illegal, decidióse cambiar les feches”.
 
Los convocantes anunciaron el paru’l 15 de febreru, 10 díes enantes como diz la llei, “pero paez qu’esiste una sentencia posterior que fai que’l día de la notificación nun cuente, polo que taría fuera de plazu”. Según el sindicatu, esti fechu ufría a la empresa la posibilidá d’amenaces que punxeran en riesgu la convocatoria, “que llevó a la decisión de realizar una nueva con toles garantíes”.
 
El paru ta convocáu, según indiquen dende CSI, porque los trabayadores de la TPA son callaos y amenazaos, “y agora nos ponen enriba la mesa’l despidu d’un compañeru de trabayu, de seición sindical y candidatu al Comité d’Empresa nes últimes eleiciones sindicales. Un compañeru qu’aprobó los sos esámenes en 2006, al que la propia empresa yá-y reconoció la improcedencia del so despidu, pretendiendo exemplificar y dar un golpe d’autoridá qu’amuese a quién-y debemos pleitesía.”.
 
CSI señala que la TPA finánciase coles perres de toos, ye pública y tien qu’afalar la llibertá d’espresión y la pluralidá informativa, “pero namás ta valiendo pal intercambiu de favores y el control del discursu na prensa asturiana repartiendo’l pastel”. Pal sindicatu,  l’ausencia de drechos llaborales y los escesos autoritarios “son el pan de cada día de la cadarma d’empreses que subcontrata la TPA”.
 
Apunten que creen nuna canal pública y nes sos posibilidaes, señalando ente estes el sector audiovisual, la creación artística y la normalización social de la llingua, “amás d’una ciudadanía más informada, plural, participativa y crítica”.
 
Poro, reivindiquen que se respete la dignidá profesional y los drechos llaborales de los trabayadores que saquen alantre la TPA cada día. Amás, faen un llamáu a la sociedá civil pa solidarizase contra los despidos na TPA y “p’amosar l’interés ciudadanu contra’l repartu fraudulentu y clientelar de les perres públiques”.
 
Estes movilizaciones, que nun van tener reflexu na emisión al tar tola programación subcontratada, yá tuvo’l so reflexu ‘l pasáu sábadu nel desfile d’antroxu d’Uviéu, cuando nel programa “Conexión Asturias”, dellos trabayadores amazcaraos y con pancartes onde podía lleese “Stops chanchullos en TPA” y “Stops despidos en TPA”, coláronse na tresmisión en direuto.
 
“Mancar la imaxe de la cadena”
 
Dende la Direición de TPA señalen que protestes como estes “manquen la imaxe de la cadena”. Dende la CSI entreguen cómo-y puen preocupar “unos cartelinos reivindicativos” mientres gasten “una millonada” en comprar a LaSexta la Champions y na Formula 1 pa que puea vese al mesmu tiempu na TPA y nel canal de Mediapro.
 
Nesi sen, recuerden que xustu depués de pagar “esa millonada”, el Direutor d’Informativos y Deportes, Juan Carlos Cuesta, foi ficháu por “La Voz de Asturias”, “acabantes de ser comprada por “Público“ (Mediapro). Tamién recuerden que’l concursu diariu “Asturias en 25” ta grabáu en Madrid nos estudios de Mediapro, “mientres nun callen col fomentu del sector audiovisual asturianu”.
 
Del mesmu mou, apunten que lo que realmente manca la imaxe de la cadena ye reducir al mínimu la programación propia, esternalizar lo qu’hai, mantener un plató “que costó una millonada” inutilizáu casi tol día, saltase los drechos llaborales y afalar los amiguismos, “comprando amás el silenciu de los periódicos asturianos al traviés de concesión de contratos millonarios a los grupos d’estos periódicos”.