Eurodiputaos nacionalistes esixen respetu a la diversidá llingüística

Dellos eurodiputaos de naciones ensin Estáu reclamaron esti xueves a la UE que fomente la diversidá llingüística nuna conferencia entamada pol grupu Alianza Llibre Europea (ALE).

Reivindicar el papel de les llingües nel conxuntu de les instituciones europees como elementu de bayura cultural fundamental foi l'oxetivu de la conferencia ‘Diversidá llingüística: un retu pa Europa’, entamada pola ALLE y na que participaron eurodiputaos de Gales, Cataluña, Córcega y Estonia, ente otros.
 
L'eurodiputáu d'ERC, Oriol Junqueras, reivindicó que'l catalán nun ye llingua oficial nes instituciones europees por que l’Estáu español nun quier. Mientres que’l corsu François Alfonsi, recordó que n'Europa hai una política insuficiente tocantes a les llingües amenazaes, “una situación entá peor n'Estaos centralistes como Francia, que refuga'l corsu, el bretón y l’occitanu”.
 
L'eurodiputáu corsu denunció qu'hai un patrimoniu européu a puntu de desaniciase porque hai una política insuficiente respetu de les llingües amenazaes. “Les instituciones europees nun faen abondo polos drechos llingüísticos y por eso les rexones que nos movilizamos pa defender la nuesa llingua y cultura tenemos d'ayudanos”, esclarió
 
Junqueras dixo que l'Estáu español niégase a pidir la oficialidá del catalán nes instituciones europees, “al igual que nun quier reconocer el catalán nes instituciones parllamentaries españoles”. Poro, dixo confiar más n'Europa que nel Estáu español, que según dixo culpabiliza a les instituciones europees sobre l’usu del catalán nes instituciones, “pero en realidá ye él el qu'incumple los alcuerdos y con ello engaña a los ciudadanos”.