Día del Llibru Asturianu

UNA quier sumar fuercies “con voluntá de permanencia” énte'l 2011

|

UNA quier articular un espaciu políticu que seya referente pal país y con capacidá d’influyir, proponiendo un “paragües conceptual” qu’axunte toles sensibilidaes del asturianismu.

Esta propuesta, que tien que ser ratificada pola militancia nel próximu Congresu de la formación, tien l’envís de “recuperar el nacionalismu como un referente social claru y como una voz que nun pueda tar ausente de cualesquier alderique importante pal nuesu país”.
 
Según el testu de la ponencia, ye necesario que l’asturianismu políticu tenga presencia institucional, con conceyales y diputaos nes instituciones asturianes “con capacidá d’influyir”. Afirmen que nesi sen van trabayar “cola vista puesta en 2011”.
 
UNA propón nesti sen l'articulación d’una alternativa de país énte proyectu del PP y PSOE-IU, “que comparten la so subordinación a un proyectu políticu nun pensáu dende y p’Asturies y la so coincidencia nel modelu cultural, social y ecolóxicu”.
 
La propuesta d’UNA ta “autocentrada nes prioridaes y necesidaes d’Asturies, moderna ya imaxinativa, que seya a meyorar la calidá de vida, la igualdá y l’autonomía de la mayoría social, rompedora col réxime de bipartidismu de fechu al introducir un tercer elementu que seya a triangular la política asturiana, qu'ufierte un discursu en positivo que se perciba como una opción de progresu social, amplia, que nun acabe n’UNA, autónoma respeutive a los discursos del PSOE-IU y PP, desbordadora de les actuales posibilidaes sociales y electorales del nacionalismu políticu organizáu, atropadora de les distintes sensibilidaes del nacionalismu asturianu y del asturianismu”.
 
La organización plantégase la necesidá de crear “un paragües conceptual, al que tolos actores implicaos-y dean forma conxuntamente”. Esto, afirmen, pue algamase al traviés d’alcuerdos con persones, organizaciones o colectivos que s’asitien nel campu del ecoloxismu, la esquierda non sucursalista o l’asturianismu.
 
La organización diz querer ganar la confianza de les más de les persones que nun militen en nenguna organización y demanden una alternativa seria ya innovadora pa ser a modernizar y da-y forma a un proyeutu que la sociedá entienda como una propuesta moderna capaz de meyorar la so calidá de vida.
 
La estratexa pretende que nesi espaciu puean vese representaos toles sensibilidaes nacionalistes, d’esquierdes, nun sucursalistes y verdes, toles persones que nesti momentu nun militen en política, que pertenecen a coleutivos locales, que trabayen nel mundu cultural y nel sindicalismu, “pa que seyan a confluyir nun proyectu común pa tresformar Asturies”.
 
UNA esclaria qu’esti ye l’apueste estratéxicu más importante de la organización, “una necesidá imperiosa como espresión d’un espaciu políticu nun sucursalista, referencial na sociedá asturiana, axuntador de lo meyor de les tradiciones del nacionalismu asturianu, del ecoloxismu políticu y de la esquierda tresformadora, que tendrán que definir con flesibilidá y xenerosidá los actores que con UNA quieran sumar fuerces nesti proyectu”.

Comentarios

Solu  una plataforma  conxunta'd  tou l'asturianismu  pode  lluchar con los partios madrileños.
Sinon dexamos de ezquerda o drecha ,non faremos nada .Esto tien que tar na cabeza ,si  queremos una alternativa !!
Agora bien el trabayu hai que facelu dende baxu ,entamando nos Conceyos, faciendo un bon trabayu'd  base,faciendo ver a  la  xente   facer les coses bien.
Una planta tien que tener bones raices pa medrar ,sinon morrira.
Non basta con facer un partiu,poro non faciendo lo cimientos pa tener la base...Dira al escaezu
Con tou ello Asturies pode dir p'allantre.

Ye verdá que ye necesaria la xuntanza de fuercies pa llegar a facer daqué nesti panorama políticu asturianu, pero polo que veo UNA sigui manteniendo na propuesta de xuntanza una llínea de Izquierdes que nes sos bases son muy radicalizaes. Entiendo que UNA seya un partiu d´izquierdes, pero que apele a una xuntanza imponiendo la so llinia política.... paezme daqué raro, pa eso que inviten directamente a integrase en UNA a la xente. Apostar por colaboración y xuntanza ye apostar por facer proyectos nos que se vean implicaos estremaes corrientes con daqué fines comunes.
A mi entender, pa poder crear una xuntanza la apertura tien que ser mayor. Hay opciones polítiques que sin ser de Derecha Lliberal, nin de Izquierdes clásiques (marxistes), tien daqué que opinar sin tener agora referente políticu algún. ¿Tendrien cabida nesa supuesta xuntanza tendencies identitaries non d´izquierdes nin lliberales?. Hay temes muy de actualidá, como´l tema inmigratoriu, coles últimes encuestes na prensa d´estos dies, que munchos partios siguen considerando tabu o a lo más manifiesten y trasladen a la sociedad una supuesta despreocupación pa con algo que realmente preocupa a cada vez más xente.
 
 

Mui bon pasu de la que ye, agora mesmo, la principal fuerza del asturianismu/nacionalismu o como queramos llamalo tenga les coses tan clares. Paezme, a lo menos, esperanzador.
Esi ye'l camín.

Contador Estadistiques