UNA va celebrar el so congresu col llema "Construyendo l'alternativa asturiana"

Los díes 6 y 7 de marzu, el Palaciu de Congresos d'Uviéu va acoyer el II Congresu d’UNA. La organización plantegará la so estratexa baxo’l llema "Construyendo l'alternativa asturiana. Ye'l momentu".

El 20 de xineru Unidá Nacionalista Asturiana entamó'l procesu que va llevar a la celebración del II Congresu d'esta organización. Según informó’l coordinador d’UNA, Miguel Ánxel Díaz, la militancia ta recibiendo estos díes la ponencia base que tien de marcar la llinia política de la organización nos próximos años. Asina, la organización quier "ufiertar una alternativa social y electoral a los bloques PSOE-IU y PP”
 
La ponencia, según comentó'l miembru de la Xunta Executiva, tien tres partes, per un llau faise un análisis de la realidá asturiana, na segunda parte, plantégase de forma xenérica l'alternativa d'UNA a la situación, y na tercer parte propónse una estratexa y llinia política, incluyendo la estratexa electoral pa les eleiciones de 2011 “que tien de ser de suma y con nueves propuestes y plantegamientos que valgan pa ilusionar al conxuntu del asturianismu social y la esquierda pensada dende Asturies".
 
La militancia tien un plazu d'un mes pa discutir, correxir y enmendar la ponencia, qu'habrá aprobase definitivamente nel Congresu y dende la organización, según el so coordinador, espérase "que l’alderique precongresual seya ampliu, diversu y que la versión final seya un documentu de síntesis que valga de base pa construyir l'alternativa asturiana moderna, abierta, de suma y de construcción qu'UNA propón".
 
Amás de la llinia política, nesti II Congresu UNA aprobará la so ponencia d'estatutos y anovará la so Xunta Executiva Nacional y la Xunta Xeneral, órganu máximu decisoriu ente Congresos.