Muerre en prisión el disidente cubanu Orlando Zapata

|

El disidente cubanu Orlando Zapata Tamayo, ún de los presos de la denominada Primavera Negra del 2003, morrió esti martes nun hospital por mor d'una fuelga de fame.

Zapata, de 42 años, declaróse en fuelga de fame'l pasáu 3 d'avientu nel penal de Quilo 8, na población de Camagüey. Esixía una subida de los sos drechos como presu. A lo útlimo, morrió esti martes nun hospital de L'Habana, onde s'atopaba a causa del so delicáu estáu de salú, que los médicos supuestamente trataron de revertir introduciéndo-y sueros per vía intravenosa.

La organización Directorio Democrático Cubano llamentó la muerte d'esti valiente defensor de la llibertá, que considera "asesináu pol réxime comunista". Nun comunicáu, sostién que'l Gobiernu cubanu "negóse a garantiza-y los sos drechos básicos, lo qu'acabó por tornalu nuna víctima del terrorismu d'estáu", según la secretaria nacional adxunta del Directorio, Janisset Rivero.
  
La organización denunció que'l pasáu mes d'ochobre Zapata sufrió una mayada per parte de militares que lu vixilaben na prisión provincial d'Holguín. "Estos golpes", prosigue la nota, "provocáron-y al presu una hemorraxa intracranial que derivó nuna operación quirúrxica".
  
El Direutoriu esplica que "dende que Zapata entamó la so fuelga de fame y mientres 18 díes el director de la prisión de Quilo 8 retiró-y la inxesta d'agua, lo qu'acabó per provoca-y un fallu renal. A mediaos de xineru al presu treslladáronlu a un hospital de Camagüey nel que contraxo una neumonía pol aire acondicionáu y a que s'atopaba casi desnudu", añade'l comunicáu.
  
"A pesar del so críticu estáu de salú, el réxime treslladólu la selmana pasada al hospital de la Prisión Combinada del Este en L'Habana, onde nun esistíen condiciones pa tratalu", denunció'l Directorio.
  
"La ma del fináu, Reina Tamayo Danger, calificó d'asesinatu antemanáu la muerte del so fíu, en declaraciones al organismu disidente. Doi les gracies a tolos hermanos que llucharon por nun dexar morrer al mio fíu", manifestó.
  
Pela so parte, dende la Comisión Cubana de Derechos Humanos y Reconciliación Nacional, el so voceru, Elizardo Sánchez, llamentó esta gran traxedia y repostió que la muerte de Zapata non sólo afecta a la so familia, "sinón a tol movimientu cubanu defensor de los Drechos Humanos, tanto na islla caribeña como nel estranxeru".
  
Amnistía Internacional incluyere a Zapata na so llista de presos de concencia. Pese a que nun primer momentu resultó condenáu a trés años de prisión tres participar nuna fuelga de fame, l'agora fináu vio cómo s'ampliaba la sentencia hasta 25 años de cárcel al sumase delitos como desacatu, desorde públicu o resistencia, según la ONG.
 
Prime fináu dende 1972
  
Los ecos de la muerte d'ún de los estandartes de la Primavera Negra llegaron hasta a Estaos Uníos, dende onde'l periódicu 'The Miami Herald' recordó que nun morría un presu cubanu mientres una protesta contra'l Gobiernu dende hai casi cuatro décaes. L'últimu, el líder estudiantil y poeta Pedro Luis Boitel, perdió la vida en 1972, tamién mientres una fuelga de fame.
  
"Asocedió otru Pedro Luis Boitel en Cuba", coincidió Reina Tamayo Danger nes sos cortes palabres al Directorio Democrático Cubano. Precisamente pa que nun se repitieren fechos como ésti, les autoridaes cubanes evitaron n'otres ocasiones les muertes de disidentes, como cuando nel 2006 alimentaron per vía intravenosa a Guillermo Fariñas, que pasó siete meses ensin comer pa esixir el llibre accesu a Internet pa los cubanos.
  
Pela so parte, el senador por Florida Bill Nelson aseguró nun comunicáu que la muerte de Zapata supón un escuru recordatoriu del tráxicu costu de la represión y la dictadura que devalúa la vida humana. Al so xuiciu, les persones de tol mundu defensores de la llibertá tendríen de facer al réxime cubanu responsable del destín d'Orlando Zapata Tamayo.

Contador Estadistiques