El grupu armáu irlandés INLA anuncia l'acabación del so desarme

|

L'Exércitu de Lliberación Nacional Irlandés anunció l'acabación del so procesu de desarme y calca na so intención de llograr la secesión del Ulster de Reinu Uníu per medios pacíficos.

El comunicáu, recoyíu pola televisión pública irlandesa RTE, ta firmáu pol Partíu Republicanu Socialista Irlandés, consideráu'l brazu armáu d'esti grupu.

El procesu de desarme, según fontes republicanes, completárase nes últimes selmanes. El grupu yá anunciare oficialmente hai cuatro meses nun actu en Dublín que "la llucha armada acabare", anque nun taba claro cuál yera'l destín del so arsenal, dao que nun se comprometiere nenguna midida al respeuto.
  
El grupu foi ún de los más activos nos años 70 y 80, cuando mató a más d'un centenar de persones, incluyíu'l diputáu conservador Airey Neave. Tamién foi responsable d'un atentáu nun pub de Ballykelly en 1982, nel que morrieron once militares británicos y seis civiles. Siete miembros del INLA, Patsy O'Hara, Kevin Lynch y Michael Devine, y siete integrantes del IRA morrieron nes güelgues de fame de 1981 nes prisiones britániques.
  
L'anunciu de desarme del INLA coincide con un históricu acuerdu ente republicanos y unionistes pa collaborar nel gobiernu rexonal del Ulster y asumir les competencies policiales y xudiciales, asina como col plazu dau por Londres pa que los grupos armaos entreguen les armes sin mieu a represalies, qu'acaba'l 14 de febreru.
  
Una vez que la Comisión Internacional Independiente pal Desarme dexe de funcionar, a cualquier otru grupu que tenga armamentu podrá perxiguilu la xusticia y podrán analizase les armes confiscaes pa llograr pruebes incriminatories.  
  
Otros grupos como la Fuerza de Voluntarios del Ulster o l'Asociación pa la Defensa del Ulster desarmáronse nos últimos meses anque'l procesu más significativu foi'l del desarme del Exércitu Republicanu Irlandés (IRA), que destruyó'l so arsenal hai cinco años.
 

Contador Estadistiques