53 blogueros votaron pola meyor páxina del 2009

53 blogueros votaron hasta les 0.00 hores del yá llunes ún de xineru, pola meyor páxina personal n’asturianu. “Una participación bona”, según los organizadores.

Tin Seoane del blogue “Trayasgaya”, ún de los empobinadores de la iniciativa, comenta que l'añu pasáu votaron 41 blogues, “nuna segunda edición, lo realmente importante paeznos afitase y crecer, cosa que pasó colos 53 d'esti añu”, señala. Pa Seoane hebo una participación bona en rellación col númberu de páxines personales n’asturianu que pue haber na rede.
 
Sicasí, l’encargáu de “Trayasgaya” esclaria que la bloguesfera asturiana nun tien namás que 53 páxines. “Estes son les que tán actives nel ampliu sentíu de la pallabra, los que s'actualicen  periódicamente, pero qu’amás, tán sollertes de lo que pasa na bloguesfera y participen d'ella, perdiendo'l tiempu en mandar unes votaciones a un corréu d'un proyeutu col que ganamos toos”, afirma.
 
Comenta que pa fomentar les votaciones y llegar al mayor númberu de páxines posible, los responsables dexaron mensaxes en tolos blogues n'asturianu qu'atoparon pela rede, “sicasí, hai dellos blogues de los que nun tuvimos rempuesta, anque tienen una gran actividá d'actualización”.
 
A mediaos d'esta selmana van espublizar los ganadores na páxina de les votaciones pa que tol mundu vea los resultaos de los blogues que tuvieron dalgún votu. “Viendo los primeros puestos paeznos que la xente votó conteníos orixinales y de calidá, bien lloñe del copia y pega y del actualizar a lo lloco”, afita Seoane.
 
Sicasí, señala qu'hai muncha xente que votó por afinidá personal política o temática. Pudo adelantanos que los tres primeros puestos tan bien diferenciaos; el ganador tien 14 votos de diferencia pa col segundu y ésti 9 pa col terceru.
 
Sidra&Blogues
 
Tin Seoane tamién s’alcuentra preparando’l programa del II Sidra&Blogues, con charres, presentación de proyeutos y la entrega del premiu al meyor blogue n’asturianu 2009. L’alcuentru será’l 20 de febreru na Casa de los Alberti de Ciañu y cuntará cola collaboración de Softastur, l’asociación Xareos y el propiu Ayuntamientu.
 
“Paeznos perimportante que los tres ganadores vayan el día 20 de febreru a Ciañu, en breve, pondrémonos en contautu con ellos pa confirmar la so asistencia”, esclaria. Dellos blogueros yá tienen confirmada la so asistencia, “la verdá ye qu'esperamos que la xente anímese y participe, porque esi va ser el verdaderu baremu pa saber si'l Sidra&Blogues foi un ésitu o non”, señala.
 
Sobre’l programa tovía nun ta nada zarrao y siguen trabayando pa consiguir ponentes, “anque la verdá ye que la xente collabora a esgaya los problemes vienen por horarios de trabayu y compromisos personales”. Tin Seoane quier finar animando a tola xente que fai blogues n'asturianu a participar “nesta folixa bloguera ensin precedentes n'Asturies”.
 
Los blogueros n'asturianu entamen el II Sidra&Blogues