Los blogueros n'asturianu entamen el II Sidra&Blogues

La comunidá bloguera n’asturianu tien una cita en Llangréu’l próximu 20 de febreru. Ellí va celebrase’l II Sidra&Blogues, con charres, presentación de proyeutos y la entrega del premiu al meyor blogue n’asturianu 2009.

L’alcuentru será na Casa de los Alberti de Ciañu y cuntará cola collaboración de Softastur, l’asociación Xareos y el propiu Ayuntamientu. Dende la organización indiquen qu’esti alcuentru nun ye más “qu'otra escusa pa siguir faciendo ruíu y moviéndonos, ye una páxina más na curtia historia d'una comunidá onde los blogues más vieyos tienen ente tres y cuatro años”.
 
El programa, empobináu por Tin Seoane del blogue TrayasgayA y Ricardo Candás de La Esfoyaza, van dir desvelándolu a lo llargo del mes, “yá que tenemos delles persones apallabraes pa dir a falar, pero tán pendientes de temes llaborales y nun queremos dicir mentires anunciando lo que nun ye”, esplica Seoane.
 
Cuenten con qu’haya tres charres curties, una sobre la rede y los blogues, otra presentando ún de los últimos estrenos na rede n'asturianu y otra “dando anuncia a otru proyeutu que ta por salir próximamente”, señalen. Amás de la entrega de premios que saldrá como resultáu de les votaciones al meyor blogue 2009.
 
Según esplica Tin Seoane, la idea d’esti alcuentru entamó en xineru de 2009, cuando dende'l blogue TrayasgayA entamóse la primer edición de la votación al meyor blogue de 2008 pa xunir y dar a conocer a la comunidá bloguera. “Esti añu nun teníamos nidio si díbamos facer les votaciones, pero animáronnos a siguir y depués de pidir ayuda a la rede, hebo xente que nos ofreció'l so trabayu, sacando alantre un proyeutu inda mayor que'l que teníamos na tiesta”, señala.

El I Sidra&Blogues foi n'Uviéu depués d’una manifestación pola oficialidá, un 24 payares de 2007, cuando s'organizaron les marches caleyando dende dellos puntos d'Asturies. Según señala Seoane “nun había un guión nin un programa, namás yera una escusa pa venos y charrar”. El II Sidra&Blogues cuntará cola collaboración del Conceyu de Llangréu al traviés del responsable del Serviciu de Normalización Llingüística, Eloy Antuña. Fueyo señala que’l so sofitu foi inmeyorable.  

Esplica que la diferencia col primeru ye importante, “por que la propia bloguesfera ye diferente, el momentu ye diferente y nós tamién”. Por exemplu diz que’l primer alcuentru foi una toma de contactu d’una comunidá moza, “d'aquella teníamos la sensación que nos conocíamos toos y podíamos pone-y cara a tolos blogues, inclús numberalos, lo que se lleía yera lo que se quería dicir y nun había dobles personalidaes, segundes intenciones nin blogueros fantasmes”, diz Seoane.
 
Mientres qu’anguaño ye más difícil saber cuántos blogues hai, cuántos tán operativos, de quién ye caún y, amás, “con una importante bayura de temes, yá que nun entamu yéramos un poco monotemáticos”, esclaria.

Los organizadores encamienten a tola xente que fai blogues na nuesa llingua, a la xente que tien curiosidá de cómo ye esti mundu y a los que-yos presta sofitar iniciatives pa caltener la nuesa cultura en xeneral, que se pasen el día 20 de febreru pola casa los Alberti de Ciañu. “Por que'l II Sidra&Blogues ta fecho por blogueros y pa blogueros, ensin más intención nin oxetivu que siguir promocionando la nuesa llingua en toles estayes”, sentencien.