ESCOLARIZACIÓN

Panorama
 
Una de les reivindicaciones cimeres del movimientu de recuperación llingüística n'Asturies foi, siempre, la entrada nes escueles de la llingua d'Asturies. La campaña que nos años 70 estró les muries d'Asturies coles pintaes de Bable nes Escueles, frutió nel añu 1984 cuando 10 centros pilotos entamen coles clases d'asturianu. Daquella p'acá otros centros de deprendimientu secundariu y primariu foron incomporándose al procesu. Sicasí el movimientu de recuperación llingüísticu considera'l procesu insuficiente y lentu por demás.

El cursu con un númberu d'alumnos mayor foi'l 95/96, con 19.737 escolinos en 150 centros de primaria. En secundaria llegóse sólo a 956 alumnos en 97/98. De magar esa fecha la situación vieno empeorando, principalmente por falta de planificación y males condiciones pal ensiñu, anque na década del 2000 los datos d'escolarización presentaron una meyora casique constante en primaria. Sicasí, la llingua sigue presentando datos d'escolarización muncho más baxos en secundaria, onde compite con otres asignatures y onde en munchos

Dende mediaos de los 80 dellos conceyos entamen, les más de les veces cola cooperación de la Conseyería de Cultura, cursos d'asturianu. Na Universidá, depués d'un procesu llargu y enllenu de problemes, l'asturianu entamó a estudiase como cursu d'Estensión Universitaria na Facultá de Filoloxía y na Escuela Universitaria de Maxisteriu, creaándose dempués los títulos propios d'Espertu y Especialista en Llingua Asturiana. Estos cursos desaniciaránse nel añu 2010 yá que cola adecuación de la Universidá d'Uviéu al nomáu Procesu de Bolognia, la Filoloxía asturiana va entrar per primer vez dientro de la enseñanza reglada como una minor de 48 créitos.
 
L'algame de la filoloxía asturiana como enseñanza reglada ye una reivindicación de vieyu del movimientu asturianista. La so aprobación en 2008 nun tuvo lloñe de polémica tres que l'equipu rectoral de la Facultá de Filoloxía propunxera la creación d'una maior (120 créitos) dientro de les titulaciones de grau que nun salió alantre pola propuesta del profesor Félix de Castro, que presentó una enmienda onde s'afitaba qu'una titulación d'asturianu "politizaba" la Universidá.
 
L'aprobación de la enmienda pola Xunta de la Facultá fizo que l'asturianu quedara fuera de la enseñanza universitaria, polo que la Decana, Ana Cano, dimitió del so cargu. Meses dempués, el Decanu en funciones, José Antonio Martíenz, presentó na Xunta de la Facultá una propuesta de minor como solución al conflictu. Tres una nueva votación, la filoloxía asturiana foi aprobada como una minor de 48 créitos y 8 asignatures, ye dicir, va estudiase como complementu a otra filoloxía.
 
La polémica volvió surdir en 2009 na Escuela de Maxisteriu cuando la so directora, Gloria López Téllez, presentó una propuesta d'estudios, qu'a la fin nun foi aprobada, onde nun s'inxería l'asturianu. Nuna segunda votación decidióse votar por separáu la mención d'asturianu y les otres propuestes, aprobándose una especialidá d'asturianu que cuntara con 30 créitos.
 
N'otru sen, l'Academia de la Llingua Asturiana entama tolos años los sos cursos de Branu pa enseñantes y públicu en xeneral.
 
Programa "Nós" (TPA): L'asturianu nes escueles
 
Programa "Nós" (TPA): L'asturianu nos institutos
 
Programa "Nós" (TPA): Cursos de branu d'Ibias