Castros

Los castros son poblaos fortificaos de la Edá del Fierru. Magar que se barrunte que puean el so aniciu nel Bronce Final, fasta güei nun esiste constancia arqueolóxica y el poblamientu castreñu d'aniciu céntrase nel sieglu VI enantes Cristo. Les necesidaes defensives condicionen dafechu la elección de los asitiamientos que s´alluguen siempre en sitios d'accesu abegosu: cabos o promontorios acantilaos na costa, cuetos o montes aisllaos dominantes so la redolada, cuestes arispies o espolones rematando xerres, etc. Les condiciones defensives naturales compléntense con inxentes obres en comuña que se centren nos llugares más accesibles del pobláu: muralles, fuexos, parapetos. Les muralles presenten polo xeneral murios de mampostería nes parees esteriores, rellenándose I'interior de tiena y piedres; el so anchor ye variatible, dende los 2 ó 3 m. fasta los 6,30 m. que presenta la de la Campa Torres (Xixón). Ente les soluciones técniques son de solliñar les llamaes muralles de módulos qu'apaecen en dellos castros asturianos: Castiellu de Moriyón (Villaviciosa), La Campa Tones (Xixón), Castiellu de Llagú (Uviéu), castru de San Chuis (Allande), etc. N´esti tipu, la muralla estáyase en dellos tramos dixebraos de planta rectangular y esquines arrondiaes, que se yuxtaponen. La so ventaxa taba en que un posible ataque podía baltar una parte, ensin que quedare esbarrumbada dafechu la llínia de defensa. La muralla solía ser el últimu elementu defensivu esistiendo ente ella davezu sistemes más o menos complexos de fuexos y contrafuexos, turries con defenses de madera no cimero, etc. En dellos castros del Occidente d'Asturies (El Picu da Mina y San Isidro) siñálase la esistencia de piedres fincaes.

So la arquitectura doméstica, les cases más característiques son de planta circular o arrondiada, constrúyense en mampostería, presentando diámetros d'alredor de 5 m.; el llar asítiase en posición central y caracterícense por ser isllaes, cadeciendo de murios medianiles con otres cortstrucciones; les sos cubiertes sedríen polo xeneral de materia vexetal, anque siñálase l'usu de llouxas de pizarra en dellos castros occidentales.

Les escavaciones arqueolóxiques de los postreros tiempos asoleyaron cases d'otra traza inda más cenciella, trátase de viviendes que teniendo la mesma planta construyen les sos paredes con xebatu cargáu con barru, sofitaes nuna basa perimetral de barru y piedres. Les cubiertes, encontaes en sofitos, iguábense con materia vexetal. Construcciones d'esti tipu localizáronse en: Camoca y Moriyón (Villaviciosa), La Campa Torres (Xixón), Castiellu de Llagú (Uviéu) y de San Chuis (Allande), etc. Nesti tipu, la mura Castiellu San Martín (Sotu'l Barcu). Esti tipu de vivienda ye'l más característicu nos hábitats celtes de la fastera atlántica na Edá del Fierro, tando documentada abondo n´Irlanda y na cultura de los hill-forts (colinas fortificadas) de les Islles Britániques.