Preséntase n'Asturies la ILP pa derogar la llei que regula la tauromaquia como patrimoniu cultural

Asturies Antitaurina collabora coles entidaes impulsores pa la recoyida de les 500.000 firmes necesaries pa ser almitida a trámite.

Baxo'l nome de 'Nun ye la mio cultura' ta promoviéndose una Iniciativa Llexislativa Popular (ILP) pa la derogación de la Llei 18/2013, del 12 de payares, pa la Regulación de la Tauromaquia como Patrimoniu Cultural. Ésta rexistróse'l 4 de xineru y los promotores tienen nueves meses pa llegar al mínimu esixíu pola norma que regula esta figura.

Esta campaña preséntase n'Asturies mañana, na xixonesa Café y Libros La Revoltosa a les 17.30 hores. Asturies Antitaurina encárgase de la xestión y organización nel país y va recoyer firmes hasta les 19 hores nesti establecimientu, ún de los munchos qu'ufren la posibilidá de sofitar la ILP.

L'oxetivu ye que la tauromaquia dexe de ser considerada Bien d'Interés Cultural a nivel estatal. D'algamar les 500.000 firmes, l'asuntu llegaría al Congresu.

Na semeya, el cantante Nacho Vegas firma la ILP na manifestación del Primeru Mayu convocada por CNT, CSI, CGT y Intersindical Asturiana.