Héctor Braga cuenta una historia na batalla d’El Mazucu nel so cantar y videoclip nuevu

‘Valiente’, cantar nel que collabora Víctor Manuel, ye’l segundu adelantu del discu nuevu d’Héctor Braga, que va tocar esti vienres na xunta estraordinaria de l’Academia de la Llingua Asturiana (ALLA) pol XLV Día de les Lletres Asturianes. El videoclip d’esti tema va estrenase tamién nesta xornada, con preestrenu esti xueves n’Uviéu.

Esti trabayu del músicu llangreanu llévanos al mes de setiembre del 1937. Ente los díes 5 y 20, na redolada del Picu Resquilones-Altu de la Tornería, nel conceyu de Llanes, desendólcase la batalla d’El Mazucu, una de les más importantes del Frente Norte de la Guerra Civil.

Nesi marcu, Braga compón un cantar que cuenta una historia de ficción na qu’un fíu y el so pá “vense somorguiaos nuna llucha de proporciones épiques qu’amuesa dafechu la llaceria d’una guerra civil”. El mesmu, nel que collabora’l cantante Víctor Manuel, va formar parte del so discu nuevu, del que yá conocemos el tema ‘Llobatu’, y, al igual qu’ésti, cuenta con un ellaboráu videoclip.

Ésti preestrenóse’l domingu en Llanes y va proyeutase esta tarde n’Uviéu enantes del so llanzamientu de mañana, Día de les Lletres Asturianes, a les 18 hores. La cita de güei va ser tamién a les 18 hores nel Club Prensa Asturiana del diariu ‘La Nueva España’ y va contar cola presencia de recreadores históricos, ente ellos un sobrín-nietu d’Aida de la Fuente desplazáu dende Alemaña.

Y ye que Braga punxo especial enfotu en que’l videoclip, dirixíu por Antonio Llaneza y Lucas Vallina, fora lo más realista posible. Asina rodóse en llocalizaciones reales de la batalla cola participación de recreadores históricos llegaos de diferentes puntos del Estáu “pa representar con precuru y rigor los uniformes y armamentu desendolcáu naquella época”.

Nel Campoamor

Una hora depués de la estrena del videoclip de ‘Valiente’ va entamar nel uvieín Teatru Campoamor la xunta estraordinaria de l’ALLA, na que la institución va recibir a Claudia Elena Menéndez Fernández y a Pablo Rodríguez Medina como académicos de númberu, y a la suiza Éva Büchi como académica d’honor. Braga va encargase de pesllar l’actu, d’accesu llibre, con dellos cantares del so espectáculu nuevu ‘Rabil’.

Na semeya, Braga xunto con recreadores históricos nel preestrenu de 'Valiente' celebráu'l domingu na Casa Municipal de Cultura de Llanes. Semeya propiedá del Conceyu de Llanes.