El ministru Urtasun aconceya güei cola ALLA

Ye'l primer responsable de la cartera de Cultura que visita'l llar de la institución académica.

Ernest Urtasun, ministru de Sumar del Gobiernu del Estáu, va aconceyar esti miércoles cola Xunta de Gobiernu de l'Academia de la Llingua Asturiana (ALLA). Va ser a les 20 hores nun actu que coincide cola celebración del Día Internacional de la Llingua Materna.

El catalán ta estos díes n'Asturies pa participar mañana nel Plenu de la Conferencia Sectorial de Cultura, que va tener llugar a les 10 hores nel avilesín Centru Niemeyer. Güei na so axenda tamién tien un alcuentru col alcalde de Mieres, Manuel Ángel Álvarez, col que va visitar el Pozu Santa Bárbara; un xunta col presidente Adrián Barbón; y l'asistencia a un actu conmemorativu del 140 aniversariu de 'La Regenta'.

Na cita cola ALLA, la institución académica va treslladar al ministru delles propuestes de política llingüística dientro del marcu estatal. Tamién va mostra-y les sos instalaciones y esplica-y el so llabor académicu.