Adrián Barbón en Bimenes: "Les nuestres llingües son depositaries de la riqueza del nuestru pueblu"

Bimenes, conceyu que tien declarao l’asturianu como llingua oficial, en concreto’l Palaciu del Marqués de CasaEstrada, foi’l llugar escoyíu pa la formalización del Conseyu de la Rede de Normalización Llingüística nesta llexislatura, que cuenta con una incorporación nueva. El presidente Adrián Barbón desplazóse a Martimporra pa la so inauguración.

“Préstame acompañar a la conseyera de Cultura, Política Llingüística y Deporte, Vanessa Gutiérrez, nel primer actu públicu que tien como nueva conseyera, y préstame especialmente qu’esi actu seya la formalización d’esti Conseyu”, espresó de primeres el socialista, que celebró la presencia de la Universidá d’Uviéu nel mesmu. “Queremos agora, cola constitución del nuevu Conseyu, dar un impulsu más na collaboración ente instituciones y axentes sociales pa fomentar l’usu y desenvolvimientu de les nuestres llingües”, siguió.

Constituyíu formalmente’l 30 de xunu del 2022, la Comisión Téunica de la Rede vien reuniéndose periódicamente d’entós p’acá, recordó Barbón, qu’amuesa “una gran confianza nel trabayu de les persones que formen parte d'esti organismu, y toi convencíu de que van llograr grandes avances na defensa y promoción del asturianu y l’eonaviegu”. “Los servicios de normalización llingüística son fundamentales pa la supervivencia y el desenvolvimientu del asturianu, una llingua que, como otres minorizaes, precisa d'actuaciones específiques pa garantizar la so presencia en tolos ámbitos de la vida social”, rescampló.

“Habrá a quien nun-y guste ver la llingua asturiana nun usu formal, pero sabemos mui bien que la mayoría de la sociedá asturiana simpatiza con esa utilización normal, que ye a lo que se refier el términu normalización: a facer normal”, apuntó, pa confesar darréu: “Préstame ver que la llingua de los mios güelos, la del mio entornu, sigue viviendo y sirve pa que tolos asturianos sepan igualmente ónde ta’l despachu d’un xuez o d’una xueza, asina, n’asturianu, o la xefatura d’estudios”.

“Construír úa Asturias máis inclusiva”

Tamién emplegó na so intervención énte los diferentes responsables de los SNL el gallego-asturiano pa espresar que “el llabor dos servicios de normalización llingüística é clave pr'asegurar qu'as llinguas propias sigan sendo llinguas vivas y presentes en todos os espacios da sociedá”. “É esencial poñer en valor este trabayo, difundindo os sous beneficios y amañando eventos que deixen á ciudadanía conocer miyor estas iniciativas. D'este xeito, imos poder construír úa Asturias máis inclusiva, unde a diversidá llingüística se vexa como un recursu cultural riquísimo y non como un motivo de división”, añadió.

“Por eso toi equí, nun conceyu como Bimenes, que destaca como exemplu emblemáticu d'usu y defensa del asturianu, representando un casu singular nel panorama de la promoción llingüística n'Asturies. Esti pequeñu conceyu demostró un compromisu firme col so patrimoniu cultural y llingüísticu al declarar de manera simbólica la oficialidá, nel añu 1997, decisión que marcó un puntu d'inflexón na percepción y el tratamientu de la llingua asturiana nes instituciones públiques y na sociedá en xeneral”, aseguró Barbón.

Por último, recordó la celebración mañana del Día Internacional de la Llingua Materna, “una fecha clave pa recordar la importancia de toles llingües nel mundu, y, en particular, pa reivindicar el papel del asturianu y del eonaviegu como llingües tradicionales d'Asturies. Estes llingües, que son les maternes de munchos asturianos, más allá de ser meres ferramientes de comunicación, son depositaries de la riqueza cultural, histórica y emocional del nuestru pueblu. Encarnen sieglos de tradición, lliteratura, folclore y identidá; pero, pese a la so importancia, enfrenten retos significativos qu’amenacen la so supervivencia”.

"Ye imprescindible tomar midíes concretes que fomenten l'usu del asturianu y del eonaviegu en toles facetes de la vida pública y privada", continuó, y insistió en que’l fechu de que la formalizacion del Conseyu sía’l primer actu públicu de Bimenes “constitúi una declaración de principios y un compromisu firme cola promoción y protección de les llingües tradicionales d’Asturies, particularmente l’asturianu y l’eonaviegu. Esta elección subraya la importancia estratéxica de reconocer y dar visibilidá a les polítiques llingüístiques dientro de la xestión pública y resalta'l papel crucial de los conceyos, como Bimenes, pioneros na defensa y normalización del usu de la llingua asturiana”.

Na semeya, Barbón saluda al alcalde Aitor García Corte baxo l'atenta mirada de la conseyera, prensa y miembros del Conseyu.