La Rede de Normalización esixe la oficialidá: "les mesmes condiciones que'l restu de llingües oficiales"

Va treslladar una declaración institucional en defensa de les llingües propies, propuesta pol Conceyu de Bimenes, a la Xunta Xeneral pa la so ratificación.

L'acalde Aitor García Corte, presente nel actu de formalización del Conseyu de la Rede de Normalización Llingüística nesta llexislatura, celebráu en Martimporra, foi'l que presentó esti documentu que contó cola aprobación de toles instituciones y conceyos presentes, nengún gobernáu pol Partido Popular (PP). Ésti recueye que "l'oxetivu de la política llingüística y de la normalización ye garantizar que toles llingües tengan les mesmas oportunidaes d'uso y desendolcu, reconociendo’l so valor intrínsecuy la so contribución al arguyu d’asturianía. Y especial atención merecen aquelles que s’encuentren minorizaes y amenazaes, como ye’l casu de l’asturianu y l’eonaviegu".

Por esti motivu llama a reconocer les dos llingües propies del país "como derechos culturales inherentes, dao que la llingua materna entiéndese como un derechu a acceder y participar na herencia cultural colectiva que tanto l’asturianu como l’eonaviegu representen. Y esti reconocimientu, pa bien ser, pasa pela declaración d’oficialidá d’estos dos idiomes, pa que tengan les mesmes condiciones que’l restu de llingües oficiales d’España".

“La diversidá llingüística nunca ha vese como una amenaza, sinón como una oportunidá”, sofita'l Conseyu de la Rede, onde tán representaes más de 40 conceyos y entidaes, que fai "un llamáu al diálogu y al consensu, pa que l'asturianu y l'eonaviegu ocupen el llugar que-y correspuende en tolos ámbitos de la vida pública y privada de la ciudadanía asturiana. Trabayemos pa que les nuestres llingües propies sigan llatiendo nel corazón d’Asturies, como símbolu de la nuesa identidá y como ponte hacia un futuru de progresu y harmonía. Habemos actuar con visión y coraxe, pa que les xeneraciones futures hereden una Asturies onde la diversidá llingüística seya de verdá celebrada como unu de los sos mayores tesoros".