“Ye’l momentu d’aprovechar pa facer cambios y da-y un emburrión a la política llingüística”, asegura Llera

Iniciativa pol Asturianu, que la nueche del martes asoleyara un comunicáu amosando la so disconformidá con una “macroconseyería compartida con Derechos Sociales”, valora de manera positiva la rectificación fecha esti miércoles por Adrián Barbón. El so presidente Iván Llera, sicasí, considera que “ye’l momentu d’aprovechar pa facer cambios y da-y un emburrión a la política llingüística” énte “la falta de puxu de la viceconseyería no que va de mandatu”.

La organización calificaba de positiva la recuperación del rangu de conseyería pa la Política Llingüística, pero temía que'l trabayu relativu a esta materia quedara “disueltu” énte’l tamañu de dicha conseyería. Una situación que-y llevaba a apostar “por caltener una viceconseyería de Política Llingüística, renovando los equipos de trabayu”.

“Ye una bona noticia que se rectificara esa decisión de crear una macroconseyería qu’axuntara Derechos Sociales y Cultura, Política Llingüística y Deporte”, apuntaba esti meudía Llera que, “dau’l tamañu enorme de Derechos Sociales” consideraba que “diba salir perdiendo la Política Llingüística”. Recoz, poro, la rectificación de Barbón, pero al empar demanda “que se camuden los equipos de Política Llingüística porque más de seis meses depués de que se formara’l Gobiernu siguimos ensin tener un subdirector de Política Llingüística y entendemos que tien qu’haber un cambiu significativou. Agora que se va reorganizar too, ye’l momentu d’aprovechar pa facer cambios y da-y un emburrión a la política llingüística porque la verdá ye que nun tamos percibiendo qu’haya avances nestos meses primeros de llexislatura.

En concreto, el comunicáu d’Iniciativa pol Asturianu referíase tamién al Plan de Normalización Llingüística, del que “tovía nun se conoz el borrador”. Tamién rescamplaba la importancia de la tresversalidá, “fundamental nes polítiques de normalización pa les llingües propies”.