Cultura y Política Llingüística vuelven a tener rangu de conseyería

Adrián Barbón decidió un cambiu na estructura del so Gobiernu al ver que dexar Cultura y Política Llingüística nuna viceconseyeria dependiente de Presidencia nun ta teniendo “los efeutos qu’ún desea”. La marcha de Melania Álvarez García al Senáu lleva al socialista a proponer una Conseyería de Derechos Sociales, Cultura, Política Llingüística y Deporte con Ana Vanessa Gutiérrez al frente.

El nomamientu d’Enrique Fernández Rodríguez como presidente d’HUNOSA, senador hasta’l momentu pola Xunta Xeneral, provoca un movimientu de fiches que da pie a Barbón a facer modificaciones a poco más de seis meses de llexislatura. La Comisión Executiva de la Federación Socialista Asturiana (FSA-PSOE) aprobó esta tarde qu'Álvarez García, conseyera de Derechos Sociales y Bienestar, sía la so sustituta na Cámara Alta, un cargu que yá aceptó y qu’agora ha ratificar el Comité Autonómicu enantes de dir a Plenu nel Parllamentu asturianu.

Esta situación va aprovechase pa facer cambios nel Executivu. “Quiciabes como direutor d’orquesta ún tien que ver cuando na estructura qu’ún crea del Gobiernu nun momentu determináu dalgo que fai con bona voluntá quiciabes nun tien los efeutos qu’ún desea”, esplicó’l llavianés, que propón que “la conseyería pasara a tener les siguientes competencies: sería Conseyería de Derechos Sociales, Cultura, Política Llingüística y Deporte. Y que la conseyera sía Vanessa Gutiérrez”, agora viceconseyera de Cultura, Política Llingüística y Deporte.