La muestra ‘Asturianes’, con 2.297 visitantes, “cumplió’l so oxetivu de dar a conocer a estes muyeres referentes”

“Tamos mui contentes”, afirma María Xosé Rodríguez López, responsable de la Oficina de Normalización Llingüística de Xixón, al echar la vista atrás a la esposición ‘Asturianes’, entamada a partir del llibru d’Alicia Álvarez con ilustraciones de María Ortiz. Un total de 2.297 visitantes pasaron pela sala 3 del Centru de Cultura Antiguu Institutu, a lo qu’hai que sumar les persones qu’acudieron a les diferentes actividaes complementaries, dalgunes con aforu completu.

“Llenamos la charra sobre Les Cigarreres, la de Les Comadres cuasi tamién, y el patiu del Antiguu Institutu pal conciertu d’Alicia y Mar. Llueu completáronse toles places de los dos talleres, el de los fogones de María Luis García y el de los bodegones de Julia Alcayde”, rellata al tiempu que recuerda “los más de 2.000 visitantes a la esposición”. Unes cifres importantes qu’asitien a esta muestra a partir de la obra asoleyada por La Fabriquina, editada na so versión n’asturianu por Araz, empresa editora tamién d’Asturies.com, ente les iniciatives más esitoses organizaes pol SNL na sala 3 xunto coles esposiciones sobre Margarita Salas o los 35 años de Dixebra.

Per dos meses, hasta’l llunes, tuvo abierta la muestra al públicu, que presentaba les ilustraciones d’Ortiz, con testos informativos sobre les venti muyeres y coleutivos que protagonicen ‘Asturianes’, asina como oxetos venceyaos a les protagonistes. “Cumplióse l’oxetivu, que coincide col de l’autora Alicia Álvarez y la ilustradora María Ortiz, de dar a conocer y visibilizar a estes muyeres referentes, un reconocimientu públicu a les que llucharon polos derechos llaborales de la muyer, como Les Cigarreres, o la defensa de la muyer, como la Tertulia Les Comadres”, espresa la responsable de la Oficina, que recuerda la collaboración de la Universidá Popular nel entamu de les actividaes.

De ruta peles escueles

La esposición ‘Asturianes’ sigue viva y va percorrer les escueles del conceyu hasta’l fin de cursu. Les primeres alumnes y alumnos en poder contemplar los diferentes paneles son los del CP ‘Príncipe de Asturias’, centru onde yá tán instalaos.

Dende dalgunos conceyos, como Grau, tamién hebo interés en poder recibir la muestra, polo que la vida de ‘Asturianes’ promete ser tan llarga como la buelga que dexaron na nuesa sociedá les venti muyeres y coleutivos que recueye’l llibru.

Na semeya, un momentu de la inauguración de la muestra.