Un documental va contar l’orixe y historia de Conceyu Bable nel so cincuentenu aniversariu

Esti 2024 cúmplense 50 años de la primer intervención pública de Conceyu Bable. Con motivu d’esti aniversariu, Cuatro Gotes Producciones trabaya nuna obra cinematográfica documental sobre l’asociación cola participación de protagonistes y historiadores, pa la que soliciten la collaboración de ciudadanos que tengan materiales de la época o información pa completar el so llabor d’investigación.

Xuan Xosé Sánchez Vicente, Xosé Lluis García Arias, Amelia Valcárcel o Carlos Rubiera son dalgunos de los miembros de Conceyu Bable que van ser entrevistaos nesta pieza audiovisual que pretende ser “un homenaxe al llabor que llevaron a cabu los homes y muyeres integrantes d’esta asociación que lluchó pola dignificación y recuperación del asturianu nos tiempos de la Transición”. Baxo la direición d’Inaciu Galán, l’equipu de la productora xixonesa lleva dellos meses trabayando nuna cinta que “va tocar l’orixe, desenvolvimientu y historia de la organización fundada en 1974 col envís de caltener y esparder la llingua asturiana y d'algamar l'autonomía política d'Asturies, cambiando dafechu la percepción de la identidá asturiana, con aportaciones tan importantes como la recuperación de la bandera d'Asturies”.

Amás de les esperiencies de los protagonistes d’aquellos años, el documental va contar cola presencia d’historiadores que van poner en contestu “l’apaición d’esta asociación en defensa del asturianu y la identidá d'Asturies”. Una obra cola que dexar pa la posteridá’l llabor d’un coleutivu clave na historia reciente del país y que sigue’l camín d’otres pieces previes de Cuatro Gotes como ‘No se dice ye, se dice es’ y ‘Elles, muyeres na lliteratura asturiana’, o'l programa de radio documental ‘Asturies 81:21, la hora de l'autonomía’ sobre la redaición y aprobación del Estatutu d’Autonomía.

La productora va siguir estos meses trabayando nesti proyeutu, pal que piden collaboración a “xente que caltenga material d’archivu, histories d'interés y otrs cuestiones que puedan completar al llabor d'investigación yá fechu”. D’igual forma, busca la “de les instituciones pa llograr un trabayu qu’afonde de manera clara na historia de la organización p’algamar un rellatu que correspuenda y faiga xusticia a les reivindicaciones de Conceyu Bable”.

Protagonista de la XLV Selmana de les Lletres Asturianes

L’aniversariu de Conceyu Bable tamién va protagonizar la XLV Selmana de les Lletres Asturianes. El periodista Francisco ‘Paco’ Álvarez trabaya, por encargu del Gobiernu, nos materiales y na coordinación de les actividaes previstes nesta edición de la gran celebración de les nueses lletres col propósitu de “facer historia y reivindicar un legáu que tovía se percibe cercanu, a pesar de los cincuenta años trescurríos dende la primer apaición pública d'esta organización”.