Memoria y música nesta xornada de la XLV Selmana de les Lletres

Xixón, Uviéu y Avilés acueyen los actos programaos pa esti xueves de la edición dedicada a Conceyu Bable.

Depués d'un día de parón pol Primeru Mayu, la XVL Selmana de les Lletres Asturianes presenta una xornada mui activa, con variedá d'actos. En Xixón, a les 19 hores nel salón d'actos de la Biblioteca Pública Xovellanos, va celebrase una mesa redonda de títulu '50 aniversariu de Conceyu Bable: testigos del entamu' cola participación de militantes del coleutivu como Vicente García Oliva, Lluis Antón González, Amalia Trancho y Xuan Xosé Sánchez Vicente baxo la moderación de María Xosé Rodríguez López, responsable de la Oficina de Normalización Llingüística de Xixón.

La Orquesta Sinfónica del Principáu d'Asturies (OSPA) presenta güei n'Uviéu, baxo la direición de Daniel Sánchez Velasco y los solistes Martín García García (pianu), Juan Barahona (pianu), Rafael Casanova (percusión) y Francisco Revert (percusión), un nuevu 'Conciertu de les Lletres Asturianes'. Va ser a les 20 hores nel Auditoriu col programa siguiente: 'Chichen Itzá', de María Teresa Prieto; 'Conciertu pa dos pianos, percusión y orquesta', de Béla Bartók; y 'Tres canciones asturianas', de Daniel Sánchez.

Actos de la Rede de Normalización

Dientro de los actos qu'entama la Rede de Normalización Llingüística nos Conceyos inclúise la presentación del audiovisual '1974. Atiendi, Asturies, atiendi. 50 años de Conceyu Bable', dirixíu por Inaciu Galán y producíu por Cuatro Gotes. Va principiar a les 19 hores nel salón d'actos del Palaciu de Valdecarzana y va completase con una charra con Miguel Solís Santos, fundador de Conceyu Bable Avilés.