El Comité d’Espertos de la Carta Europea de les Llingües sigue recoyendo información sobre la situación del asturianu

El procesu de recoyida d’información pa contrastar l’aportada pol Estáu sobre’l cumplimientu de la Carta Europea de les Llingües Rexonales o Minoritaries pa la ellaboración del sestu informe, correspondiente al periodu 2017-2021, sigue activu. Nel casu del asturianu y el gallego-asturiano hebo contautos ente'l Comité d’Espertos y diferentes suxetos y instituciones, como l’Academia de la Llingua Asturiana (ALLA).

Del 15 al 19 d’esti mes una delegación d’esti organismu del Conseyu d’Europa encargáu d’esaminar la situación real de les llingües minorizaes de los estaos firmantes de la carta pa informar depués al Comité de Ministros tuvo presente n’España, calteniendo conceyos en Barcelona, Iruña y Madrid con representantes de falantes de los diferentes idiomes. La voluntá del Comité d’Espertos de celebrar un aconceyamientu presencial colos asturianos nun se pudo concretar por problemes a la hora de treslladar la convocatoria, lo qu’imposibilitó’l desplazamientu a dalgún de los trés llugares que se visitaron nesta ocasión –nel 2018, pal quintu informe, Uviéu foi una de les paraes–, pero finalmente concretóse un alcuentru en llinia aquellos díes ente Maxime Huot, cabeza de dicha delegación, y Iniciativa pol Asturianu.

Esta selmana pasada hebo contautos cola ALLA, institución cimera nel estudiu, promoción y defensa del asturianu y del gallego-asturiano, y nestos díes van ampliase a otros coleutivos y suxetos. La intención del Comité d’Espertos ye recoyer la mayor cantidá d’información posible pa contrastar cola aportada pol Ministeriu de Política Territorial nel ‘European Charter for Regional or Minority Languages. Sixth Compliance Report by the Kingdom of Spain, 2017-2021 (Carta Europea de les Llingües Rexonales o Minoritaries. Sestu informe de cumplimientos del Reino de España, 2017-2021)’, a partir de la información treslladada polos diferentes gobiernos autonómicos, pa la ellaboración del sestu informe con recomendaciones a los estaos pal plenu cumplimientu de la Carta.

Pero enantes de la so redaición, va comunicar con representantes del Gobiernu d’Asturies pa conocer de manera direuta la so posición sobre la situación del asturianu y el gallego-asturiano.

Los encamientos del quintu informe

Nel quintu informe, correspondiente al periodu 2015-2017, asoleyáu n’avientu del 2019, les recomendaciones del Comité de Ministros del Conseyu d’Europa a partir de la evaluación del Comité d’Espertos apuntaba que “l’asturianu nun ye oficial n’Asturies; sicasí, hai un fuertu sofitu públicu na sociedá pa facelu oficial”. L’organismu encamentaba a les autoridaes españoles p’ameyorar la proteición y promoción del idioma a introducir de forma inmediata nel Estatutu d’Autonomía el términu ‘asturianu’ pa referise al mesmu, yá qu’anguaño apaez como ‘bable’ y “los falantes insisten en que la llingua sólo debería llamase asturianu” y, como otres recomendaciones, “ameyorar la ufierta d’asturianu en tolos niveles educativos”, “l’usu del asturianu n’Alministración rexonal y llocal” y “l’aumentu del usu del asturianu nos medios de comunicación”.

Nel casu del gallego-asturiano, apuntaba la necesidá de facer, de forma inmediata, “desendolcar una política estructurada de proteición del idioma nel territoriu onde se fala (rexón del Eo-Navia)” y "incluyir el nome de gallego-asturiano nel Estatutu d'Autonomía d'Asturies", onde anguaño nun se cita, y, como recomendación adicional, afala a la cooperación “con comunidaes autonómes vecines nes que s'usa l'idioma”. La delegación del Comité d’Espertos recibió en Madrid nesta ocasión información de manera presencial d’Axuntar, coleutivu del Eo-Navia que se desplazó a la sede del Instituto Cervantes, onde tuvieron llugar los alcuentros, xunto con coleutivos en defensa del gallegu.

Na semeya, un momentu del últimu Plenu del Comité d'Espertos de la Carta Europea de les Llingües Rexonales o Minoritaries, el setentenu séptimu, celebráu en payares en Strossburi, col sestu informe sobre'l cumplimientu del testu en Dinamarca y encamientos inmediatos a Suiza como cuestiones a tratar. El próximu ta programáu pa marzu.