Barbón agradez a Urtasun "la so apuesta por reconocer l'asturianu magar el bloquéu del PP-VOX a la oficialidá"

El presidente ufre la collaboración del so Gobiernu al ministru de Cultura.

Depués de la intervención d'ayeri d'Ernest Urtasun na Comisión de Cultura del Congresu, Adrián Barbón espublizó un mensaxe en castellanu na rede social X con firma personal emponderando'l discursu del voceru de Sumar. "Esceicional intervención del ministru", entamó'l socialista, qu'afirmó que la so "apuesta por reconocer l'asturianu, magar el bloquéu del PP-VOX n'Asturies pa impidir reconocer la oficialidá nel nuesu Estatutu ye dalgo que, como presidente, tengo que valorar mui positivamente".

Por último, espresó "ministru, cuenta col Gobiernu de xunidá progresista y reformista pa ello". Poco menos de venti minutos tardaría en responder Urtasun, citando'l mensaxe de Barbón: "Munches gracies, presidente. El nuesu compromisu pa cola pluralidá llingüística ye firme y contamos con toles alministraciones pa protexela y fomentala".

Na semeya, Barbón el xueves nuna intervención na so visita a planta nueva de Coxersa de tratamientu de la fraición restu.

Muchas gracias, Presidente. Nuestro compromiso con la pluralidad lingüística es firme y contamos con todas las administraciones para protegerla y fomentarla. https://t.co/yAsQqRWaiw

— Ernest Urtasun (@ernesturtasun) January 22, 2024