Los cuentos fáense realidá na función final d'Escenines pa la Reciella

Represéntase en Xixón 'Cuidáu coles palabres'.

El festival navidiegu Escenines pa la Reciella, que vien regalándonos estos díes espectáculos en llingua asturiana pa neñes y neños, llega esta tarde al so fin. Va ser a les 19 hores cuando Violeta y Julia, dos bibliotecaries que ven como pieslla la vieya biblioteca del pueblu, vuelvan al llugar onde trabayaben.

Na visita al vieyu edificu pa despidise d'él atopen nun rincón los llibros de Milio, los sos preferíos. Queden pa disfrutar de les sos máxiques histories y sorpréndense cuando les palabres conviértense en realidá.

Guayominí Producciones pon n'escena 'Cuidáu coles palabres', función pa tolos públicos con accesu de baldre hasta completar aforu. 'Reciella. Families pol Asturianu', qu'entama esta iniciativa cola collaboración del Conceyu y el Gobiernu al traviés del ciclu 'Asturies, Cultura en Rede', encamienta a llegar con antelación al patiu del Centru de Cultura Antiguu Institutu énte la previsión d'enllenu.