El II Ciclu de Poesía QED pieslla cola presencia del vascu Kirmen Uribe

El Premio Nacional de Narrativa del 2009 va recitar n'Uviéu xunto colos poetes asturianos Aníbal González y Esther Prieto.

El II Ciclu de Poesía Quod Erat Demonstrandum (QED) llega al so fin esta tarde cola tercera sesión programada nesta edición. Llueu del pasu pela Biblioteca d'Asturies de Niño de Elche y la gallega Chus Pato, el convidáu nesta ocasión ye Kirmen Uribe.

L'autor vascu va tar acompañáu nel salón d'actos por González, Premiu Asturies Moza de Poesía 2021, y por Prieto, poeta y copropietaria d'Ediciones Trabe. Una xornada d'intercambiu poéticu, cultural y llingüísticu qu'entama l'Asociación Cultural Mezá col patrociniu económicu de la Viceconseyería de Cultura, Política Llingüística y Deporte, baxo la coordinación de Miguel Rodríguez Monteavaro, que tien l'oxetivu de "promocionar y dar voz a los poetes en llingua asturiana y gallego-asturianu fuera d'Asturies y trayer dellos referentes qu'escriben n'otres llingües como exemplu de lo que se ta faciendo actualmente n'otres árees d'Europa".

D'igual forma, el QED "nació col enclín de ser un puntu d'alcuentru pa les diferentes xeneraciones y estilos de poetes asturianos, buscando siempre la calidá y la visión de futuru lliterariu".