La XDLA encamienta al Gobiernu a que tea sollerte nel usu de la toponimia oficial y que la respete

Estos díes la Xunta pola Defensa de la Llingua Asturiana (XDLA) señaló trés casos d’incumplimientu de la llegalidá toponímica, pero nun son los únicos. El coleutivu encamienta al Gobiernu a que cumpla con ella y que “tea sollerte coles demás alministraciones pa que respeten la toponimia oficial na renovación, actualización o creación de señales, apps, etc.”.

Primero foi’l vienres una anuncia del Executivu sobre cortes de tráficu poles voladures na central térmica de Soutu na que s’emplegaba’l derogáu ‘Soto de la Barca’. Dirixéndose al presidente Adrián Barbón na rede social X espresaba que “el respetu del Gobiernu a la toponimia oficial ye variable como la veleta del cantar. Nel periodu electoral cumplíase siempre. Agora, un día bien... y munchos mal. ¿Cuándo se va respetar dafechu?”, recordando que Soutu ye “forma única oficial” dende 2017.

Ayeri facíase ecu de la información d’Asturies.com sobre l’ausencia de la toponimia asturiana nel llibru de ruta de La Vuelta, que recibe perres del Gobiernu, al traviés de Turismu, y de los conceyos por pasar per Asturies, señalando que “cumplieron dos años la toponimia... y nunca más”, y güei de que l’aplicación anovada d’Adif continúa ensin emplegala. “Esto súmase a otros casos, nel mesmu ámbitu, d'actualización de diseños o sistemes que, cola renovación, siguen ensin respetar la toponimia”, apunta XDLA, que pon d’exemplu “el mapa depués de la integración tarifaria de RENFE-FEVE o la señalización nueva na estación de La Pola”, un cambiu de cartelería pol qu’esti mediu entrugó a la empresa pública, ensin atopar entá respuesta.

“Encamentamos al Gobiernu pa que cumpla la llexislación toponímica y pa que tea sollerte coles demás alministraciones pa que respeten la toponimia oficial na renovación, actualización o creación de señales, apps, etc.”, espresa’l coleutivu depués de los últimos casos.

Na imaxe, una captura de l'aplicación d'Adif.