Autores nel Camín lleva a Barreñada y Barreiro a Corvera y Ḷḷena

Inés de Lavandera, ganadora del Premio Quiastolita, va tar tamién en Samartín d'Ozcos.

El ciclu Autores nel Camín entama los trés últimos eventos d'esti añu, concentraos toos na xornada de mañana, xueves. Ésti lleva per toa Asturies a los diferentes ganadores de los Premios Lliterarios pa tener alcuentros colos llectores.

Gonzalo G. Barreñada, merecedor del XLIII Premiu Xosefa Xovellanos de novela, correspondiente al 2002, con 'El viaxe del cacique', va falar d'esti títulu colos participantes nel Taller de Llectura n'Asturianu de Corvera qu'entama la Casa de la Llingua. Va ser a les 19 hores nel Centru Socio-Cultural de Les Vegues.

A la mesma hora na Casa Cultura de La Pola va tar presente Damián Barreiro. El periodista va presentar ‘Asturianía kitsch: decálogu de la cultura pop ástur’, l'ensayu col que ganó l'añu pasáu'l XXVIII Premiu Máximo Fuertes Acevedo.

Completa esta xornada lliteraria la presencia d'Inés de Lavandera na Casa Cultura de Samartín pa falar colos llectores de ‘Bolo’, el títulu col que ganó nel 2022 el II Premio Quiastolita de Lliteratura Infantil que convoca la Oficina de Coordinación Cultural y Llingüística del Parque Histórico del Navia. La participación de la escritora en gallego-asturiano ta anunciada a les 16 hores.