Mieres celebra'l Día Internacional del Eusquera con un conciertu de MICE

Miren Narbaiza y la so banda van ufrir al públicu asturianu la so propuesta musical en vascu.

Esti domingu, 3 d'avientu, conmemórase'l Día Internacional del Eusquera, una celebración a la que se quier incorporar Mieres. La estaya de Cultura de Conceyu sofita un conciertu entamáu por Ixuxú Cultura de MICE nuna apuesta por fomentar la diversidá llingüística y el diálogu intercultural.

Va ser en Mieres Centru Cultural, a les 19.30 hores, cuando va sonar en direuto esti grupu a mediu camín ente’l rock noventeru, l’indie y la canción d’autor. El so trabayu últimu ye 'Lautada', terceru d'esti proyeutu, "un álbum onde Miren Narbaiza recuerda a PJ Harvey o Cat Power, con una escencia mui indie-rock de los 90 y a traviés de la que fai xugueteos electrónicos con tormentes guitarreres, amás d’invitaciones al groove. Too ello cola so personal voz enllena de colores, lluces y testures", anuncien los organizadores d'esti conciertu con entrada llibre.