El I Premiu Pachín de Melás de testos teatrales ye pa Dolfo Camilo Díaz

Dolfo Camilo Díaz pasa a la historia por ser el primer ganador del Premiu Pachín de Melás de testos teatrales qu’entama’l Gobiernu al traviés de la Viceconseyería de Cultura, Política Llingüística y Deporte. El de Caborana presentó la obra ‘Flahsback’, que va representase como parte de la recompensa del gallardón.

El “arte col que remana’l xéneru de la comedia y l’habilidá pa integrar númberos musicales nuna obra de tonu ácidu y irreverente que trata temes de la historia asturiana recién” foi lo que valoró’l xuráu del Pachín de Melás pa decidise pola obra de Díaz ente les 9 presentaes al concursu na so primer edición. Amás, rescampla, “failo presentando una trama mui ellaborada qu’avanza de manera áxil y dinámica al traviés de personaxes mui auténticos que dexen patente el dominiu del rexistru coloquial del asturianu”.

Antón García, direutor xeneral d’Aición Cultural y Normalización Llingüística, actuó como presidente de dichu xuráu, que tuvo conformáu pol escritor y traductor Henrique Facuriella; l’actriz y direutora de la compañía É Vero Teatro, Verónica Gutiérrez González; y la tamién actriz y profesora de la Escuela Superior d’Arte Dramáticu del Principáu d’Asturies (ESAD), Begoña Quirós. Laura Marcos, filóloga adscrita al Serviciu de Planificación Llingüística, fixo’l llabor de secretaria.

El Pachín de Melás de testos teatrales, que lleva’l nome pol que se conoció al dramaturgu xixonés Emilio Robles Muñiz (1877-1937), fundador de la corriente costumista o teatru asturianu de la naturaleza, ta dotáu con 6.000 euros y contempla, amás, la coedición del testu y la coproducción de la obra con una compañía profesional, aparte del compromisu d’incluyila ente les actividaes culturales promovíes por Cultura, Política Llingüística y Deporte. El so oxetivu, amás de reconocer el llabor de Pachín de Melás, ye promover la creación y incentivar la puesta n’escena d’obres de teatru n’asturianu.

Díaz ye la primer persona en llevalu y failo con un testu nel que llevaba trabayando dellos años. Nacíu en Caborana nel 1963, ye ún de los escritores más renocíos de les nueses lletres, como amuesen los sos cuatro Premiu Xosefa Xovellanos de novela (‘Añada pa un güeyu muertu’ nel 1985, ‘Diariu de viaxe’ nel 1995, ‘Imago’ nel 2006 ex aequo con ‘El pisu d’enriba’ de Xulio Arbesú y ‘Advenimientu’ nel 2008) o’l IX Premiu María Josefa Canellada de lliteratura infantil, correspondiente al añu 2016, pol ‘La mar’, y llevó a escena una ventena d’obres de teatru.

Falta por conocer el Florina Alías

Con esti fallu yá se conocen siete de los ocho Premios Lliterarios convocaos esti añu. Enantes la Viceconseyería de Cultura Política Llingüística y Turismu comunicó que’l XV Premiu Alfonso Iglesias de cómic foi pa Xon de la Campa por ‘Misteriu nel soterrañu’; el XIX Premiu Xuan María Acebal de poesía, pa Xosé Anxelu Gutiérrez Morán por ‘Les hores de lluz’, que tamién llevaría’l el XVI Premiu María Josefa Canellada de lliteratura infantil y xuvenil con ‘Contando colos deos’; el XXIX Premiu Máximo Fuertes Acevedo d’ensayu, pa Héctor Braga por ‘Nel cantu la memoria. Ensayu sobro l’asturianada tradicional’; el XLIV Xosefa Xovellanos de novela, pa Xulio Vixil por ‘Miel amargo’; y el III Premiu Enriqueta González Rubín de narrativa moza, pa Beatriz Quintana por ‘La tráxica hestoria de cómo Abraham mató la música’.

Queda pendiente d’aconceyar el xuráu del III Premiu Florina Alías a la meyor traducción, al qu’aspiren 12 trabayos. Otra manera, esta tarde va axuntase’l del VII Premiu y Festival Nel Amaro en Llingua Asturiana o Gallego-asturiano a les 16 hores na sede de la viceconseyería, ún de los dos gallardones artísticos que se convoquen en paralelu a los Premios Lliterarios y que güei pieslla la so etapa de festival cola representación como exhibición de ‘Les madreñes vacíes’, de Carlos Alba (18 hores, Teatru Filarmónica d’Uviéu), obra ganadora del añu pasáu.