David Guardado entra na Xunta de Gobiernu de l'ALLA como vicepresidente

L’Academia de la Llingua Asturiana (ALLA) celebró na tarde del miércoles Xunta Ordinaria d’Académiques y Académicos, na que zarró’l procesu eleutoral pa escoyer al sustitutu de Marta Mori na vicepresidencia de la entidá. Resultó elixíu na votación el filólogu David Guardado, qu'esti añu pasara a forma parte de la institución.

L’Academia de la Llingua Asturiana (ALLA) celebró na tarde d’esti miércoles Xunta Ordinaria d’Académiques y Académicos, na que zarró’l procesu eleutoral pa escoyer al sustitutu de Marta Mori na vicepresidencia de la entidá. Resultó elexíu na votación el filólogu David Guardado.

La de Guardado yera la única candidatura presentada y, siguiendo’l procesu que marquen los estatutos de l’ALLA, llevóse a sufraxu. D’esta forma nomóse al xixonés vicepresidente, cargu que llevaba vacíu dende la renuncia de Mori en marzu pa centrase nel so compromisu políticu y social

La Xunta de Gobiernu de la institución, eleuta hasta xunu del 2025, sigue presidida por Xosé Antón González Riaño, con Guardado agora na vicepresidencia. Xosé Ramón Iglesias Cueva fai de secretariu, Carmen Muñiz ye vicesecretraria y Carlos Lastra, ayalgueru.

Cofundador d’Asturies.com

Nacíu nel 1970 y llicenciáu en Filoloxía Inglesa, amás de diplomáu n’Estudios Avanzaos en Filoloxía, Guardado desendolca’l so llabor profesional nel Departamentu de Conteníos y Productu de Prensa Ibérica. Ye autor del esitosu ensayu ‘Nunca vencida. Una historia de la idea d'Asturies’, ente otros trabayos, y nel so currículu profesional rescampla la puesta en marcha nel 1997 d’Asturies.com xunto con Fernando de la Fuente.