Mori abandona la vicepresidencia de l'ALLA

|
Marta Mori recortada

La docente va dir na llista municipal d'IX en Xixón qu'encabeza Javier Suárez Llana.

Marta Mori abandona'l cargu de vicepresidenta de l'Academia de la Llingua Asturiana (ALLA). Comunicó esta decisión el pasáu día 3 de marzu al considerar necesario nesti momentu dar prioridá al so compromisu políticu y social.

La institución amuesa'l so respetu pola decisión de la tamién direutora de la revista 'Lliteratura', que diz entender, y confirma que va siguir cuntando "coles sos valibles aportaciones como académica de númberu". Mori llevaba nel cargu dende'l 2017, cuando Xosé Antón González Riaño resultó escoyíu como presidente de la entidá tres la decisión d’Ana María Cano de nun presentase a la reeleición.

Ente los 12 primeros de la llista

Suárez Llana apuntó que la incorporación de la profesora ye “un pasu más na apuesta d'apertura a la ciudá que tamos faciendo pa construyir el proyeutu de futuru que queremos pa Xixón. Sumar con Marta ye sumar cola nuesa cultura y cola nuesa llingua, y ye sumar cola educación pública. Qu'una persona col prestixu y la trayeutoria de Marta forme parte d'esti proyeutu ye un motivu d'allegría y d'agradecimientu”.

Mori, que va dir ente los 12 primeros puestos de la llista, según confirmó'l sábadu'l candidatu de la coalición, diz tar "mui enfotada nel proyeutu qu’IX-Más País ta preparando pa la ciudá. Les polítiques municipales xixoneses tienen qu’actualizase p’adaptase a los retos que nos ta plantegando’l sieglu XXI: equidá educativa, breches dixital y de xéneru, urbanismu y economía sostenibles, integración de la población inmigrante, atención en salú mental y potenciación del accesu a la cultura y el deporte, sobre too de la infancia y la mocedá…".

Contador Estadistiques