“En Chiapas o Verines represento a un coleutivu; abre puertes a munchos compañeros”, afirma Rodríguez Monteavaro

L’escritor bualés Miguel Rodríguez Monteavaro participó’l mes pasáu nel XXXIX Encuentro de Verines, na población llanisca de Pendueles, y viaxó a México como convidáu del IX Festival Mundial de Poesía Contemporánea San Cristóbal, en Chiapas, ande llevó la so obra nes llingües propies d’Asturies. “Ellí represento a un coleutivu; esti tipu de coses abre puertes a munchos compañeros”, esplica.

Poetes llocales, de Costa Rica, Puertu Ricu, Colombia, Chile, Bolivia, Exiptu, Kurdistán, Iraq o la India, amás de la gallega Yolanda Castaño, que conoció ellí la concesión del Premio Nacional de Poesía pola so obra en gallegu ‘Materia’, axuntaron del 27 al 30 de setiembre en San Cristóbal de la Casas nun certame de poesía con presencia del asturianu y gallego-asturiano de la mano de Rodríguez Monteavaron. “Foi un festival de 5 díes con recitales, actos culturales de tou tipu, charres y meses redondes, y visites a institutos pa falar colos rapaces”, apunta l’autor, una axenda mui apretada pero que resultó ser una gran esperiencia y oportunidá.

La invitación llegó va unos meses, momentu nel que “empecé a buscar financiación pal viaxe”, que finalmente pudo consiguir. La presencia l’añu pasáu na India convidáu pol Instituto Cervantes y otros eventos “permiten que te conozan y que cada vez tenga más ‘bolos’”, espresa Rodríguez Monteavaro, que fixo contautos en Chiapas que podríen llevalu nun futuru próximu a Bolivia, Costa Rica o Puertu Ricu.

“Conoces a un montón de xente, texes llazos con toos ellos, y d’un ‘bolo’ sal otru ‘bolo’”, añade’l de Bual, que rescampla’l bon recibimientu y l’interés que xeneró tanto l’asturianu como’l gallego-asturianu ente participantes y públicu del Festival Mundial de Poesía Contemporánea San Cristóbal de las Casas. “Hai más prexuicios n’Asturies que cuando vas pel mundu. Nestos festivales da igual na llingua qu’escribas mientres la poesía sía escuchable, recitable y de calidá; al final comuníqueste na del llugar onde teas. Pero tol mundu interésase polo que ye Asturies y poles sos llingües”.

Nos mesmos díes nes que taba en Chiapas, otra autora como María Esther García López taba en Ciudá de México pa participar nel I Encuentro de Poetas Iberoamericanos y Blanca Fernández en Sardigna pa recibir el II Premio Ondras “pola promoción de les llingües minoritaries europees”. Tres escritores dando a conocer les nueses lletres pel mundu, lo que lleva a Rodríguez Monteavaro, que nun pudo coincidir cola valdesana en tierres mexicanes al tener que centrar la visita al festival de Chiapas, a apuntar que “hai un caldu de cultivu” pa dar visibilidá nel esterior a la lliteratura asturiana.

L’alcuentru de Pendueles

Selmanes enantes, del 13 al 15 de setiembre, el de Bual acudía como convidáu nel XXXIX Encuentro de Escritores y Críticos de las Letras Españolas qu’entama’l Ministeriu de Cultura y Deportes en collaboración cola Universidad de Salamana na Casona de Verines, en Pendueles, nel que tamién participó Miguel Barrero. Esta edición les xornaes llevaben el títulu de ‘Construyendo nuevos mundos, derribando viejas fronteras. La recepción de las letras españolas actuales en Europa’.

“Foi un eventu potentísimu, 3 díes de convivencia con escritores y estudiosos de lliteratura nel que conocíu xente mui interesante”, confesó Rodríguez Monteavaro, que, enllazando cola idea anterior, señaló que “ellí represento a un coleutivu; esti tipu de coses abre puertes a munchos compañeros”.

Na semeya, Rodríguez Monteavaro recita nuna actividá del IX Festival Mundial de Poesía Contemporánea San Cristóbal de las Casas un poema de 'Oi, que dice mamá que volvas', la so última obra lliteraria, que presenta esta tarde n'A Veiga.