El decretu nuevu de toponimia que va permitir oficializar los nomes xeográficos va publicase esti mesmu añu

Política Llingüística cuenta con disponer d’un decretu nuevu de toponimia “enantes de que termine esti añu” y poder entamar asina cola oficialización de los nomes asturianos de montes, ríos o sableres. La Comisión Especializada de Toponimia Xeográfica fixo importantes avances na llexislatura pasada pa la so recuperación.

El decretu actual, de xunetu del 2002, taba namás pensáu pa los nomes de población, un procesu que ta práuticamente completáu, yá que namás queden 4 de los 78 conceyos por aprobar el so espediente. Son Navia –el que taba más avanzáu–, Cuideiru, Allande y Ibias, que nun pudieron zarrase la llexislatura pasada como yera’l deséu de la Conseyería de Cultura, Política Llingüística y Turismu, cola intención de que se retome yá depués de los cambios vivíos nes diferentes corporaciones llocales.

El siguiente pasu nel llibru de ruta de Política Llingüística yera arrancar cola oficialización de los topónimos xeográficos, un camín pal que se punxeron les bases l’añu pasáu. Asina constituyó en xunu del 2022 la Comisión Especializada de Toponimia Xeográfica de la Xunta Asesora de Toponimia, con 5 especialistes en cartografía y cuestiones llegales y 6 miembros del propiu organismu, que fixo importantes avances pa la recuperación de los nomes asturianos de montes, ríos o sableres.

Una de les cuestiones necesaries pa entamar con esti segundu procesu yera l’adaptación del decretu de toponimia del 2002. Finalmente decidióse la redaición d’ún nuevu en llugar de modificar l’actual, un procesu alministrativu que yá ta en marcha y que dende Política Llingüística esperen que salga publicáu nel Boletín Oficial del Principáu d’Asturies (BOPA) “enantes de que termine esti añu”.

Va ser nesi momentu cuando va poder empezase cola oficialización de los topónimos xeográficos. La previsión ye que nesta llexislatura haya grandes avances nesti procesu gracies al importante llabor fechu al respeuto dende la Xunta Asesora de Toponimia y la comisión específica estos meses.

Na semeya, sablera de Vallina, nel conceyu de Cuideiru.