La oficialización de los topónimos xeográficos tradicionales va necesitar adaptaciones llegales

La Comisión Especializada de Toponimia Xeográfica, constituyida pa siguir col procesu de recuperación de los topónimos tradicionales una vegada que se ta completando'l de los llugares, afitó’l mou de trabayu nel so primer aconceyamientu, que sirvió de presentación de los 11 miembros. La oficialización de los nomes de montes o ríos va necesitar adaptaciones llegales al nun tar contempláu nel decretu actual.

Ye una de les cuestiones que se trataron na tarde del miércoles na sede de la Conseyería de Cultura, Política Llingüística y Turismu. Una modificación necesaria que, sicasí, nun va suponer un problema al ser la toponimia competencia del Gobiernu d’Asturies.

L’aconceyamientu supunxo una primer toma de contautu ente los 11 miembros de la Comisión Especializada de Toponimia Xeográfica, 5 especialistes en cartografía y cuestiones llegales y 6 que participen na Xunta Asesora de Toponimia. Nel mesmu presentáronse los integrantes, afitóse la forma de trabayu y falóse de la necesidá de definir la priorización de la escala y les temátiques sobre les que se va trabayar nesti siguiente pasu del procesu pa recuperar los nomes tradicionales del país, nesti casu los de los elementos xeográficos como sableres, montes o ríos, amás de la citada necesidá de facer les adaptaciones llegales correspondientes.

Na semeya, A Seimeira, en Santalla d'Ozcos, que forma El Río Augüeira.