Niño de Elche, Chus Pato y Kirmen Uribe van participar nel II Ciclu de Poesía QED

Esti trimestre últimu del añu va volver celebrase na Biblioteca d’Asturies el Ciclu de Poesía QED, estrenáu nel 2022 pa promocionar y dar voz a los poetes en llingua asturiana dientro y fuera del país. Va contar con trés recitales, ún cada mes, cola presencia como convidaos de Niño de Elche, la gallega Chus Pato y el vascu Kirmen Uribe.

Miguel Rodríguez Monteavaro repite como coordinador d’esta iniciativa entamada pola Asociación Cultural Mezá col patrociniu económicu de la Viceconseyería de Cultura, Política Llingüística y Deporte. Si na primer edición del Quod Erat Demonstrandum (QED) pasaron per Uviéu la occitana Aurélia Lassaque, la gallega Olga Novo y el vascu Bernardo Atxaga p’alcontrase con autores como Xaime Martínez, Xuan Bello, María García y Marta Mori, y músicos como Xosé Antón Fernández ‘Ambás’ o Nacho Vegas, nesta ocasión repítese la fórmula.

El 27 d’esti mes va tener llugar la primera de les trés sesiones, siempre a les 19 hores na Biblioteca d’Asturies ‘Ramón Pérez de Ayala’. El cantante Niño de Elche va xuntase cola tamién música Lorena Álvarez y l’escritor Alejandro Fernández-Osorio.

En payares Pato, una de les máximes esponentes de la poesía gallega contemporánea, va sentase con Patricia Suárez y Sergio G. Camblor. Va ser el día 24, mentes que’l 22 d’avientu va desplazase al país Uribe, Premio Nacional de Narrativa nel 2009, pa vese con Aníbal González y Esther Prieto.

“L’oxetivu principal del ciclu QED ye promocionar y dar voz a los poetes en llingua asturiana y eonaviegu fuera d’Asturies y trayer dellos referentes qu’escriben n’otres llingües como exemplu de lo que se ta faciendo actualmente n’otres árees d’Europa”, esplica la organización, qu’añade qu’esti certame “nació col enclín de ser un puntu d’alcuentru pa les diferentes xeneraciones y estilos de poetes asturianos, buscando siempre la calidá y la visión de futuru lliterariu”.

Na semeya, Antón García, direutor xeneral d'Aición Cultural y Normalización Llingüística, y Rodríguez Monteavaro. El cartelu del Ciclu de Poesía QED ye diseñu de Diego Estebo.