Xon de la Campa presenta una novela “d’espada y bruxería nel principiu de la monarquía asturiana”

‘La bastarda de Pelayu’ ye la estrena como novelista de Xon de la Campa. Conocíu poles sos ilustraciones, l’últimu ganador del Alfonso Iglesias de cómic presenta una obra “d’espada y bruxería nel principiu de la monarquía asturiana” na que busca "desmitificar" la figura de Pelayu, que presenta esti xueves na Librería Cervantes.

“Ye una novela entrenida, cola que pasar un bon ratu”, apunta sobre ella l’autor, que la considera afayadiza sobre manera pa persones a les que-yos guste la mitoloxía y la historia. Una obra con “aición, lluches y sexu”, de fantasía dinástica al estilu de ‘Games of Thrones’, na que s’amesten personaxes reales, como Pelayu o Favila, con otros inventaos.

La protagonista ye Flavia, mulata que ye fía bastarda del primer monarca del país. “Na estancia de Pelayu en Córdoba tien una aventura con una concubina del califa. D’ella naz una neña, a la que manden p’Asturies y meten na corte”, esplica Xon de la Campa sobre esta figura, “una persona que ta ente dos mundos”.

Como comenten dende la editorial especializada, Radagast, les páxines del llibru presenten “un Reinu d’Asturies míticu nel qu’aínda alienda’l cuélebre, la xente venera al nuevu ‘dios descalzu’ y a los vieyos dioses y creatures como la Guaxa, los muertos vivientes y la bruxería tán mui presentes”. Una historia “épica y grandiosa”, añade l’escritor, na que trata de “desmitificar a Pelayu”.

“Nunca me prestó la utilización que se fai de Cuadonga, el ‘covadongismu’. Lo que nos llega ye mui sesgao, tamos toos fabulando, los qu’escribieron sobre ello 200 años depués y yo”, comenta Xon de la Campa, que presenta un Pelayu “que de dalguna manera taba destináu y sabíalo, pero que nun tenía gana de lluchar por ello”.

En compañía de Seoane

El xixonés, que tamién ilustra la so obra, va tar presente esta tarde n’Uviéu pa presentar ‘La bastarda de Pelayu’, que cuenta con una versión en castellanu, ‘La hija bastarda de Don Pelayo’, traducida dende la orixinal n’asturianu. Va ser a les 18.30 hores nel espaciu cultural ‘Foro Abierto’ de la Librería Cervantes, actu nel que va tar acompañáu por Helena Seoane, autora de ‘La otra cara de Morgana’, que va falar sobre la perspeutiva de xéneru de la novela y la construcción de los personaxes.

Na semeya, Xon de la Campa firma exemplares de 'La bastarda de Pelayu'.